jetpisbai.kz Ұлы Дала жаңалықтары
Шымкентте күзгі-қысқы кезеңде жедел респираторлық вирустық инфекциялар (ЖРВИ) мен тұмаудың алдын алуға ерекше назар аударылуда. Бұл туралы Өңірлік коммуникациялар қызметінің ақпарат алаңында өткен брифингте қалалық Санитариялық-эпидемиологиялық бақылау департаменті басшысының орынбасары Айгүл Тұрымбетова мәлімдеді.
2026 жылдың сегіз айында қалада 147 952 ЖРВИ жағдайы тіркелген. Оның 92 661-і 14 жасқа дейінгі балалар арасында анықталған. Тұмау емес вирустарды анықтау мақсатында 238 сынама зерттеліп, оның 122-сінен оң нәтиже алынған. Қыркүйек айынан бері 5 967 ЖРВИ жағдайы тіркелсе, оның 2 978-і балаларға тиесілі. Бұл кезеңде тұмау жағдайлары анықталған жоқ.
Мамандардың айтуынша, күзгі-қысқы кезеңде адамдар көп жиналатын жабық орындарда, қоғамдық көліктерде және білім беру ұйымдарында инфекцияның таралу қаупі артады. Осыған байланысты мектептер мен балабақшаларда балалардың денсаулық жағдайын бақылау, бөлмелерді тұрақты желдету, санитариялық тазалықты сақтау және ауру белгілері бар балаларды уақытылы анықтау маңызды.
Білім беру ұйымдарында сырқаттанушылық деңгейіне қарай қосымша шектеу шаралары да қарастырылған. Егер бір инкубациялық кезең ішінде сынып оқушыларының 20 пайызы ЖРВИ-мен ауырса, 10 күн бойы сыныпқа жаңа оқушыларды қабылдауға шектеу қойылып, кабинеттік оқыту жүйесі тоқтатылады. Ал сырқаттанғандар үлесі 30 пайызға және одан жоғары болған жағдайда оқушылар онлайн оқыту форматына ауыстырылады.
Тұмаудың алдын алудың негізгі тәсілдерінің бірі – вакцинация. Шымкентте жергілікті бюджет есебінен 150 мың доза «Гриппол+» вакцинасы сатып алынған. Вакцина осал топқа жататын азаматтарға тегін салынады. Мамандар тұрғындарды тұмауға қарсы екпе алу мәселесіне жауапкершілікпен қарап, медициналық кеңеске жүгінуге шақырады.
Сонымен қатар инфекцияның таралуын азайту үшін тұрғындарға адам көп жиналатын орындарға баруды шектеу, қажет болған жағдайда маска тағу, қолды жиі жуу және антисептик қолдану ұсынылады. Үй-жайларды тұрақты желдетіп, ылғалды тазалау жүргізу де маңызды. Жөтелгенде немесе түшкіргенде ауыз бен мұрынды жабу, науқас адамдармен жақын қарым-қатынастан аулақ болу қажет.
Ауру белгілері байқалған жағдайда өзін-өзі емдемей, медициналық көмекке жүгінген жөн. Әсіресе балалардың денсаулығына мұқият назар аударып, олардың жағдайы нашарлаған кезде дәрігерге уақытылы қаралу маңызды.
Жалпы, Шымкентте ЖРВИ мен тұмаудың алдын алу жұмыстары вакцинация, санитариялық талаптарды сақтау және халықтың медициналық сауаттылығын арттыру бағыттарын қамтиды. Мамандардың кеңестерін орындау инфекцияның таралу қаупін төмендетуге және тұрғындардың денсаулығын қорғауға мүмкіндік береді.
