jetpisbai.kz Ұлы Дала жаңалықтары
Шымкент қаласында атмосфералық ауаның сапасын бақылау бірнеше бағыт бойынша жүзеге асырылуда. Атап айтқанда, тұрақты мониторинг жүргізу, рейдтік іс-шаралар ұйымдастыру, өндірістік нысандардың экологиялық талаптарды сақтауын қадағалау және тұрғындардан келіп түсетін өтініштерді зерделеу жұмыстары жүйелі түрде жүргізіледі.
Бұл туралы Шымкент қаласының Өңірлік коммуникациялар қызметі алаңында өткен брифингте Экология департаментінің өкілдері мәлімдеді. Кездесу барысында қаланың экологиялық ахуалын бақылау, атмосфералық ауаның ластануының алдын алу және тұрғындардың өтініштері бойынша атқарылған жұмыстардың нәтижелері таныстырылды.
Қаладағы ауа сапасын бағалау мақсатында «Қазгидромет» мекемесінің бақылау бекеттері арқылы тұрақты мониторинг жүргізіледі. Сонымен қатар бірқатар ірі кәсіпорында атмосфераға таралатын шығарындыларды онлайн режимде бақылауға мүмкіндік беретін автоматтандырылған жүйелер жұмыс істейді. Бұл тетіктер ауа сапасын қадағалап, қоршаған ортаға әсер ететін факторларды анықтауға мүмкіндік береді.
Экологиялық бақылаудың маңызды бағыттарының бірі — тұрғындардан келіп түсетін өтініштерді қарау. Әсіресе жекелеген аумақтардағы жағымсыз иістерге қатысты шағымдар назарға алынып, олардың пайда болу себептерін анықтау үшін арнайы бақылау шаралары ұйымдастырылды.
Осыған байланысты Экология департаментінің мамандары мен Ұлттық сараптама орталығының қызметкерлері бір ай бойы жекелеген индустриялық аймақтар мен оларға іргелес аумақтарда атмосфералық ауаның жай-күйіне мониторинг жүргізді. Зерттеу барысында ауа құрамындағы бірқатар заттарға талдау жасалып, тиісті бақылау жұмыстары атқарылды.
Мұндай зерттеулер тұрғындардан түскен өтініштерді жан-жақты зерделеуге, ауа сапасына ықпал ететін ықтимал факторларды анықтауға және экологиялық жағдайды бағалауға бағытталған. Сонымен қатар бақылау нәтижелері қоршаған ортаны қорғау шараларын жетілдіруде маңызды рөл атқарады.
Департамент тарапынан экологиялық мәдениетті қалыптастыруға да ерекше көңіл бөлінеді. Осы мақсатта жоғары оқу орындары мен мектептерде түсіндіру жұмыстары жүргізіліп, экологиялық сағаттар ұйымдастырылды. Мұндай іс-шаралар жас ұрпақтың табиғатқа деген жауапкершілігін арттырып, қоршаған ортаны қорғаудың маңызын түсіндіруге бағытталған.
Алдағы уақытта атмосфералық ауаның сапасын бақылау, рейдтік іс-шаралар және түнгі уақыттағы мониторинг жұмыстары жалғасады. Негізгі міндет — ауа сапасына әсер ететін факторларды дер кезінде анықтау, экологиялық талаптардың сақталуын қамтамасыз ету және қала тұрғындары үшін қолайлы әрі қауіпсіз орта қалыптастыру.
