jetpisbai.kz Ұлы Дала жаңалықтары
Түркістан ҚПБ-ға жергілікті тұрғын арызданды. Жәбірленуші ер адамның айтуынша, алыс танысы жер телімінің құжаттарын жасап беретінін айтып, 1 100 000 теңге ақшасын алған. Жәбірленуші жарты жыл бойы алаяқтың сөзіне сенген, алайда ол не ақшасын қайтармаған, құжатын жасамаған. Осы мәселенің түйінін шешу мақсатында жәбірленуші азамат полицейлердің көмегіне жүгінді. Тәртіп сақшылары аталған жайтты ҚР ҚҚ-нің 190-бабы «Алаяқтық» бойынша тіркеуге алды.
Түркістан ҚПБ-ның полицейлері жедел-іздестіру жұмыстарын жүргізіп, күдікті деп танылған ер азаматты жергілікті мекенжайынан ұстады. Оны бірден басқармаға жеткізді. Күдікті Сауран ауданының тұрғыны болып шықты.
Белгілі болғандай, күдіктінің бұдан басқа 3 жайтқа қатыстылығы анықталды. Жәбірленушілердің әрқайсысынан 600 мың мен 400 мың теңге аралығында ақша алып, жалпы 3 000 000 теңгеге шығын келтірген. Сондай-ақ полицейлер күдіктінің еш жерде жұмыс істемейтінін растады. Қазіргі таңда күдікті азаматқа қатысты сотқа дейінгі тергеу амалдары жүргізілуде.
Осы айдын басында Түркістан облысына қарасты Сарыағаш аудандық полиция бөліміне Келес ауданының тұрғыны арызданды.
Шағымданушы әйел адамның айтуынша, оның танысы «Өзбекстан Республикасынан арзан бағада киім алып, Алматы қаласының тұрғындарына сатамыз» — деп, әбден сеніміне кіріп, алдаған.
Сондай-ақ, жәбірленушіден алдын-ала тауарға деп 500 000 теңге ақша алған. Аталған жайтты полиция қызметкерлері Қазақстан Республикасы қылмыстық кодексінің 190-бабы «Алаяқтық» бойынша тіркеуге алды.
Сонымен қатар, хабарлама келіп түскен сәттен бастап тәжірибелі тәртіп сақшылары жедел түрде іздестіру жұмыстарын жүзеге асырды. Осы ретте тәртіп сақшыларының тиянақты әрі жедел-іздестіру шараларының нәтижесінде Сарыағаш ауданының тұрғыны, бұрын сотты болған ер адам ұсталды.
Түркістан облысының полицейлері азаматтардан алаяқтардың арбауына түсіп қалмауды сұрайды. Қандай жағдай болмасын, анық-қанығын білмей, белгісіз азаматтарға ақша аудармауға және бермеуге, сенбеуге қатаң ескертеді, деп хабарлайды jetpisbai.kz ақпараттық агенттігі Түркістан облысының Полиция Департаментінің баспасөз қызметіне сілтеме жасап.
