jetpisbai.kz Ұлы Дала жаңалықтары
Шымкент қаласының Әл-Фараби ауданы прокуратурасының ұйымдастыруымен «Халық заңгері» акциясы өтті. Іс-шараның негізгі мақсаты – тұрғындардың құқықтық сауаттылығын арттыру, азаматтардың құқықтық мәселелерін шешуге жәрдемдесу және тегін заңгерлік көмек көрсету.
«Shymkent Plaza» сауда орталығында өткен акцияға жергілікті атқарушы және құқық қорғау органдарының, аумақтық мекемелердің өкілдері, прокурорлар, тергеушілер, жеке сот орындаушылары, адвокаттар және басқа да заң саласының мамандары қатысты.
Іс-шара барысында тұрғындар өздерін толғандырған мәселелер бойынша мамандардан кеңес алды. Атап айтқанда, жер телімдерін заңдастыру, тұрғын үй кезегіне тұру, баспананы жекешелендіру, инженерлік инфрақұрылым және интернет-алаяқтыққа қатысты сұрақтар көтерілді. Мамандар азаматтарға әр мәселенің құқықтық негіздерін түсіндіріп, оларды заң аясында шешу жолдары бойынша кеңес берді.
Әл-Фараби ауданы прокурорының орынбасары Сәбит Төлегеновтың айтуынша, «Заң мен тәртіп» қағидаты аясында мұндай акциялар тоқсан сайын бір рет өткізіледі. Бұл жолы тұрғындар мен қала қонақтарына қолайлы жағдай жасау мақсатында іс-шара адам көп шоғырланатын сауда орталығында ұйымдастырылды.
Акция аясында азаматтарға тегін құқықтық кеңес беріліп, олардың өтініштері мен сауалдарына жауаптар ұсынылды. Мұндай бастамалар тұрғындардың құқықтық сауаттылығын арттыруға, заң көмегіне қолжетімділікті кеңейтуге және азаматтардың құқықтары мен заңды мүдделерін қорғауға бағытталған.
Мұндай форматтағы кездесулер тұрғындар мен құқық қорғау органдары арасындағы өзара байланысты нығайтуға мүмкіндік береді. Азаматтардың мәселелерін тікелей тыңдап, тиісті сала мамандарынан кеңес алу олардың құқықтық сауаттылығын арттырып қана қоймай, күнделікті өмірде кездесетін құқықтық мәселелерді шешу жолдарын түсінуге көмектеседі. Сонымен қатар, тұрғындардың өтініштеріне уақытылы жауап беру мемлекеттік органдар жұмысының ашықтығы мен қолжетімділігін арттыруға ықпал етеді.
«Халық заңгері» секілді акциялардың тағы бір маңыздылығы – азаматтардың өз құқықтары мен міндеттері туралы ақпарат алуына жағдай жасау. Құқықтық кеңестер арқылы тұрғындар заң талаптарын тереңірек түсініп, түрлі құқық бұзушылықтардың алдын алу жолдарымен танысады. Әсіресе, алаяқтық әрекеттерден сақтану, мүліктік құқықтарды қорғау және мемлекеттік қызметтерді алу мәселелерінде мұндай түсіндіру жұмыстарының маңызы зор.
