jetpisbai.kz Ұлы Дала жаңалықтары
Республика күні мерекесінде Шымкент аспаны түрлі түске боялды. 25 қазанда Shymkent City Park саябағында отбасыларды, балаларды, қала тұрғындары мен қонақтарын біріктірген батпырауықтар фестивалі өтті. Мерекелік іс-шараны «Visit Shymkent» туристік ақпараттық орталығы ұйымдастырды.
Фестивальдің ең әсерлі сәттерінің бірі – бір мезетте 1000 батпырауықтың көкке көтерілуі болды. Сонымен қатар келушілерге батпырауық ұшыру жарыстары, алып әуе құрылымдарының шоуы, балаларға арналған шеберлік сабақтары мен интерактивті бағдарламалар ұсынылды.
Мерекелік көңіл күйді концерттік қойылымдар, би нөмірлері мен диджейлердің музыкалық бағдарламалары толықтырды. Кішкентай қонақтар үшін аниматорлар жұмыс істеп, сабын көпіршіктерінің шоуы ұйымдастырылды. Ал арнайы демалыс аймақтары отбасыларға таза ауада жайлы уақыт өткізуге мүмкіндік берді.
«Visit Shymkent» туристік ақпараттық орталығының басшысы Заманбек Орынбеков фестивальдің тек мерекелік іс-шара ғана емес, сонымен қатар қаланың отбасылық демалыс үшін тартымды орын екенін көрсетуге мүмкіндік бергенін атап өтті.
– Біз Шымкент тұрғындары мен қонақтарына жарқын эмоциялар сыйлап, Республика күнін жақындарымен бірге атап өтуге мүмкіндік беруді мақсат еттік. Мұндай іс-шаралар ерекше атмосфера қалыптастырып, адамдарды біріктіреді әрі қаланың туристік әлеуетін ашуға ықпал етеді. Шымкентте отбасылар мен өзге өңірлерден келетін қонақтарды тартатын іс-шаралардың көбейгені біз үшін маңызды, – дейді Заманбек Орынбеков.
Фестиваль алаңында балалар батпырауық ұшыруды үйренсе, ересектер түрлі белсенді шараларға қатысып, мерекелік бағдарламаны тамашалады. Көптеген тұрғын фестивальге отбасыларымен бірге келіп, әсерлі сәттерді бөлісіп, естелік суреттерге түсті.
Мерекелік бағдарламаның тағы бір бөлігі мотоцикл маусымының жабылуына арналды. Іс-шараға Республика күнін бірге атап өтуге жиналған 200-ге жуық мотоциклші қатысты.
Фестиваль қала тұрғындары мен қонақтарына мерекені ерекше форматта атап өтуге мүмкіндік берді. Ашық аспан астындағы ойын-сауық бағдарламалары әр жастағы келушілердің басын қосып, демалыс күнін мазмұнды өткізуге жағдай жасады.
Осындай мәдени-көпшілік іс-шаралар Шымкенттің туристік тартымдылығын арттырып, қаланың отбасылық демалыс пен белсенді уақыт өткізуге қолайлы бағыт ретіндегі әлеуетін танытуға ықпал етеді. Сонымен қатар мерекелік бастамалар тұрғындардың қоғамдық өмірге белсенді араласуына және қала қонақтарына жағымды әсер қалдыруға мүмкіндік береді.
