jetpisbai.kz Ұлы Дала жаңалықтары
Қазақстан Президенті Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында ерекше білім беру қажеттіліктері бар балаларды қолдау, инклюзивті білім беру инфрақұрылымын дамыту және мұғалімдердің кәсіби қызметіне қолайлы жағдай жасау мәселелерін көтерді.
Мемлекет басшысының айтуынша, Қазақстанда инклюзивті білім алуға тиіс 237 мыңнан астам бала бар. Ерекше білім беру қажеттіліктері бар балалар санының артуы бұл бағыттағы жұмысты жүйелі түрде жетілдіруді талап етеді. Осыған байланысты Үкімет пен әкімдіктерге қажетті инфрақұрылымды дамыту, білім беру нысандарын жоспарлау кезінде инклюзия мәселесін назардан тыс қалдырмау міндеті жүктелді.
Президент ерекше қажеттіліктері бар балаларға сапалы білім алуға жағдай жасаумен қатар, маман тапшылығын азайту және диагноздарды ерте жастан анықтау жұмыстарын жолға қою қажеттігін атап өтті. Бұл ретте «Қазақстан халқына» қорының да белсенді атсалысуы маңызды. Мұндай шаралар балалардың жеке қажеттіліктерін уақытылы анықтап, олардың білім алуына және қоғамға бейімделуіне қажетті қолдауды көрсетуге мүмкіндік береді.
Жолдауда білім беру саласындағы реформалардың мұғалімдердің күнделікті жұмысына әсері де ерекше назарға алынды. Қасым-Жомарт Тоқаев кез келген өзгеріс ұстаздың жұмысын жеңілдетуге және артық жүктемесін азайтуға бағытталуы керектігін айтты. Бұрын қағаз түрінде жүргізілген есептердің орнына цифрлық платформалар мен ақпараттық жүйелердегі есептіліктің көбеюі мұғалімдерге қосымша міндет жүктеп отырғанын атап өтті.
Мемлекет басшысы мұғалімнің негізгі міндеті – балаларға сапалы білім беру және саналы ұрпақ тәрбиелеу екенін еске салды. Сондықтан педагогтердің уақытын алатын, негізгі қызметіне кедергі келтіретін артық жұмыстарды қысқарту қажет. Цифрлық шешімдер ұстаздардың жұмысын жеңілдетіп, білім беру үдерісінің тиімділігін арттыруға қызмет етуге тиіс.
Сонымен қатар Президент мұғалімдердің абыройы мен кәсіби беделін қорғау мәселесіне тоқталды. Мектептерде оқушылардың ұстаздарға дөрекі сөйлеп, тіпті күш қолдану жағдайларының кездесуі алаңдаушылық туғызатынын айтты. Мұндай оқиғалар кезінде мектеп әкімшілігі тарапынан мұғалімге қысым көрсетуге жол берілмеуі керек.
Мемлекет басшысы мектептегі кез келген даулы жағдайды жан-жақты әрі әділ қараудың маңызын атап өтті. Бұл үдерісте отбасы, оқушы, мұғалім және мектеп әкімшілігі ортақ жауапкершілікті сезінуі қажет. Ал Оқу-ағарту министрлігі педагогтердің құқықтарын қорғау және мектептердегі осындай мәселелерді шешу жұмыстарын тұрақты бақылауда ұстауға тиіс.
Жалпы, Жолдауда көтерілген бастамалар білім беру жүйесінде әр балаға қажетті қолдау көрсетуге, инклюзивті ортаны дамытуға және мұғалімнің кәсіби қызметіне қолайлы жағдай қалыптастыруға бағытталған. Балалардың білім алу мүмкіндіктерін кеңейту, педагогтердің артық жүктемесін азайту және мектептегі өзара құрмет пен жауапкершілікті нығайту – сапалы білім мен саналы ұрпақ тәрбиелеудің маңызды шарттары.
