jetpisbai.kz Ұлы Дала жаңалықтары
Шымкенттен алғашқы шақырылушылар әскерге аттанды, деп хабарлайды jetpisbai.kz ақпараттық агенттігі. Бұл туралы Шымкент гарнизонының баспасөз қызметі мәлімдеді. Шымкентте еліміздің барлық аймақтарымен қатарлас көктемгі әскерге шақыру науқаны басталды. Үшінші мегаполистің бірінші тобы Қазақстан Республикасы Ұлттық қауіпсіздік комитетінің Шекара қызметі қатарына аттанды.
Әскери қызмет – абыройлы міндет. Биыл Қазақстан Қарулы күштерінің қатарын мыңдаған қостанайлық жас сарбаз толықтырады.
Мерзімді қызмет орындарына медициналық комиссиядан, жеке сұхбаттасудан және психологиялық тұрақтылығын анықтайтын сынақтарынан сәтті өткен 15 адам кетті. Қалыптасқан дәстүр бойынша шақырылушыларды шығарып салар алдында әскерге шақыру комиссиясының отырысы өтті. Отырыста жастардың қызмет ету себебі мен психологиялық көңіл-күйі тағы да нақтыланып, оларға Отан қорғаушылардың дәстүрлеріне адал болуларын және қызметтерін абыроймен атқаруын тіледі. Әскерге шақыру комиссиясы ең алдымен техникалық мамандығы, физикалық дайындығы, денсаулығына байланысты әскери қызметке жарамды және әскерге баруға ниет білдірген шақырылушыларды бірінші кезекте қарастырады.
Шымкент қаласы қорғаныс істері департаменті бастығының орынбасары, полковник Әжімұхан Шынтаевтың айтуынша, әскерге шақыру науқаны 30 маусымға дейін жалғасады. Төрт ай ішінде Шымкенттен 18-27 жас аралығындағы 900-ге жуық ер-азамат әскерге шақырылады.
— Шақыру науқанының жоспарына сәйкес бірінші кезекте Ұлттық қауіпсіздік комитетінің Шекара қызметі, Мемлекеттік күзет қызметінің бөлімшелері, содан кейін – Қарулы Күштердің әскери бөлімдері, Төтенше жағдайлар министрлігі мен Қазақстан Республикасы Ұлттық ұланы жасақталады, — деп толықтырды полковник Әжімұхан Шынтаев.
Айта кетсек, еліміздің заманауи армиясында мерзімді әскери қызметті өтеу үшін барлық қолайлы жағдайлар жасалған, бір жылға жалғасатын мерзімді қызметтері аяқталғаннан кейін, барлық сарбаздар жоғарғы оқу орындарына тегін түсуге және кәсіби әскери болуға мүмкіндік алады.
