jetpisbai.kz Ұлы Дала жаңалықтары
Шымкент қаласында «Жасөспірім» жедел профилактикалық іс-шарасы тоғыз тәулік ішінде жасөспірімдердің қатысуымен 600-ге жуық әкімшілік құқықбұзушылық анықталды, деп хабарлайды jetpisbai.kz.
Жергілікті полиция қызметі басқармасының қызметкерлері «Жасөспірім» жедел профилактикалық іс-шарасын тұрақты түрде өткізіп келеді.
Іс-шараның негізгі мақсаты — қала аумағында кәмелет жасына толмағандардың қауіпсіздігін қамтамасыз ету мақсатында түнгі уақытта ойын – сауық орындарында болған, ата-анасының бақылауынсыз жүрген балаларды, мектептерде құқық бұзушылыққа бейім лидерлерді анықтау.
Шара барысында кәмелет жасына толмағандарға қатысты 574 әкімшілік құқықбұзушылық анықталды. Оның ішінде: ҚР ӘҚБтК-нің 132 бабы (Кәмелетке толмағандардың түнгi уақытта ойын-сауық мекемелерiнде болуына жол беру) бойынша – 18, ҚР ӘҚБтК-нің 200 бабы (Қазақстан Республикасы заңнамасының алкоголь өнімін өткізу жөніндегі талаптарын бұзу) – 1 жайт, ҚР ӘҚБтК-нің 442 бабының 1 бөлігі (Кәмелетке толмағандардың түнгі уақытта заңды өкілдерінің еріп жүруінсіз сағат 22-ден таңғы 6-ға дейін ойын-сауық мекемелерінде болуы) бойынша – 21 жасөспірім анықталды.
Сондай-ақ, ҚР ӘҚБтК-нің 442 бабының 2 бөлігі (Кәмелетке толмағандардың заңды өкілдерінің еріп жүруінсіз тұрғынжайдан тыс жерде сағат 23-тен таңғы 6-ға дейін болуы) бойынша – 524, ҚР ӘҚБтК-нің 127 бабы (Кәмелетке толмаған адамды тәрбиелеу және (немесе) оған білім беру, оның құқықтары мен мүдделерін қорғау жөніндегі міндеттерді орындамау) бойынша 3 ата-анаға әкімшілік шара көріліп, қадағалаусыз жүрген 66 жасөспірім бейімдеу орталығына орналастырылды.
Шымкент полициясы ата-аналарға балаларыңыздың бос уақытында қандай іспен айналысып жүргендіктеріне баса назар аударып, мұқият көңіл бөлулеріңізді ескертеді. Өз балаларыңыздың тәртібі мен қауіпсіздігі үшін жауапты екендеріңізді назарда ұстаңыздар.
