jetpisbai.kz Ұлы Дала жаңалықтары
Шымкент қаласында бассейнге барған балаларға қауіпсіздік ережелері түсіндірілді, деп хабарлайды jetpisbai.kz. Бұл жөнінде Шымкент қаласы әкімінің баспасөз қызметі мәлім етті.
Қазір жаз маусымында балалардың үш ай жазғы демалысы, ересектердің еңбек демалысына орай серуендеу және шомылу уақыты. Яғни теңізде, бассейнде, су айдынында шомылсаңыз да, ешқашан судағы қауіпсіздік ережелері туралы ұмытпау керектігін ескергеніміз жөн. Осы мақсатта Қаратау ауданы әкімдігі мен аудандық төтенше жағдайлар басқармасымен бірге аудан аумағындағы бассейн аймағы бар нысандарды аралап, балаларға суда жүзу кезіндегі қауіпсіздік және жазатайым оқиға орын алған сәтте алғашқы көмек көрсету ережелерін кеңінен түсіндірді. “Ыстық күні суға түсу қауіпті, бұл жүректің тоқтауына және естен тану қаупіне әкелуі мүмкін. Балалар немесе ересектердің су астында қарсылас ретінде аяғынан ұстап тартып, ойын ойнау бұл өте қауіпті. Шын мәнінде оқыс оқиғаға орын алуы мүмкін.
Ал ешқандай қауіп-қатер туындамаса, жалған дабыл көтеріп, суға батып бара жатқандай көрініс жасаудың қажеті жоқ. Себебі шын қауіп туындаған кезде сізге сенбей қалуы мүмкін. Бұл ережелерді суға шомылушы әрбір бала білуі тиіс”, — дейді аудандық төтенше жағдайлар басқармасы өкілдері. Еске сала кетейік, аудан және аудандық төтенше жағдайлар басқармасы тарапынан шомылу маусымы кезеңіндегі қауіпсіздік ережелерін сақтау бойынша түсіндірме жұмыстары тұрақты жүргізілуде.
Айта кетейік, Шымкент қаласындағы су айдындарынан бактериологиялық зерттеуге сынама алынды. Санитариялық-эпидемиологиялық бақылау қызметі жазғы кезеңде қала аумағындағы шомылу және демалу орындардағы жүзу бассейндері мен ашық су қоймалары суының сапасына және орталықтанған су құбырынан алынатын жүзу бассейндерінен зертханалық зерттеулерге сынама алумен мониторинг жүргізеді. Осы ретте маусымдық шомылу кезеңінің басталуына байланысты түрлі инфекциялық аурулардың алдын алу мақсатында мониторинг бойынша осы жылдың маусым айында су айдындарындағы судың сапасына бактериологиялық зерттеулер жүргізу үшін 13 сынама, санитариялық-химиялық зерттеулер үшін 9 сынама, тырысқақ ауруына 84 су сынамасы алынды. Сынама алынған орындардың барлығы санитариялық нормаларға сай келеді.
