jetpisbai.kz Ұлы Дала жаңалықтары
Мемлекет басшысы Қ.Тоқаев «Әділетті мемлекет. Біртұтас ұлт. Берекелі қоғам» атты Жолдауында «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек, деп айтып өткен болатын.
Осы орайда, Шымкент қаласының әлеуметтік-экономикалық дамуы, жол, инфрақұрылым, абаттандыру жұмыстары жоспарға сай атқарылуда.
Ақпараттық-коммуникациялық орталығының брифинг алаңында Шымкент қаласы Абай ауданы әкімінің міндетін уақытша атқарушы Нұрлан Тілеш ауданды дамыту бағытында атқарылған жұмыстары мен алдағы жоспарлары туралы ақпаратымен бөлісті.
Баспасөз жиынында аудан аумағындағы ауыз су, электр жарығы,табиғи газ, тұрғын үйлерді кәріз жүйесімен қамтамасыз ету бойынша атқарылған ауқымды істер сараланды. Атап айтқанда, бүгінгі таңда аудан аумағы бойынша 27 елді мекеннің 26-ы сапалы ауыз сумен қамтылған. Электр жарығы бойынша 27 елді мекеннің 25-і электр жарығымен қамтылып, ол 92,5 пайызды құрап отыр. Жоспарға сәйкес 257 мыңнан астам халқы бар аудан жыл соңына дейін ауыз сумен, сапалы электр қуатымен толық қамтылады.
Аудан тұрғындарын көгілдір отынмен қамту жұмыстары да қарқынды жүргізілуде. Аудан аумағы бойынша 27 елді мекеннің 20-ы табиғи газ жүйесімен қамтылса, қалған 7 елді мекен қатты отынды пайдаланады. Осы мақсатта Көкбұлақ, Батыс, Арғымақ, Ақжар, Ақтас, Ақтас-2, Нұршуақ елді мекендеріне газ кіргізу жұмыстары басталған. Құрылыстың бірқатары келесі жылға өтпелі.
– 2024-2025 жылы жылы 5 елді мекен, атап айтқанда, Ынтымақ-2 Қайнарбұлақ саяжайы, Бозарық, Жаңақұрылыс аумағы, Тәуелсіздікке 20 жыл табиғи газбен қамтылатын болады. Аудан аумағында су басу және көлдеу қауіпі бар 18 орын анықталған. Аталған су басу орындарына ирригациялық жүйелер салу жұмыстары басталды, 2025 жылға дейін толық бітіп қалады. Абай ауданына әлеуметтік маңызы бар нысандар да қажет. Онда әзірге 18 емдеу мекемесі жұмыс істейді. Олардың 11-і жеке меншік, қалғаны мемлекеттік нысандар. Бұл тұрғындар үшін аздық етуде. 2023-2024 жылдары жеке инвесторлар Ынтымақ шағынауданының №14 емдеу орталығы филиалын салып бермекші. Сондай-ақ, Қайнарбұлақ саяжайы мен Қайнарбұлақ тұрғын алабына да емхана салу жоспарда бар, – дейді Нұрлан Тілешұлы.
Ауданда мектеп тапшылығын жою мақсатында 2023-2025 жылдары «Жайлы мектеп» ұлттық жобасы аясында 7 білім ғимараты салынады. Биыл 4 мектеп Нұршуақ, Жаңатұрлан, Бозарық шағынаудандарында бой көтерсе, 2025 жылға дейін заманауи білім ошақтары Асар -2, Шымкент Сити, Достық елді мекендерінен салынады.
Аудан аумағында санитарлық тазалық жұмыстары тұрақты түрде жүргізіліп келеді. Бүгінгі таңда аудан аумағы 7 секторға бөлінген. Әрбір сектор бойынша тазалыққа жауапты мамандар бекітіліп, 23 техника 210 адам жұмылдырылған.
Ауданда халық қауіпсіздігі де қашан да назарда. Биыл жоспарға енгізілген көшелер жарықтандырылып, белгіленген аумақтарға 250 бейнебақылау қондырғысы орнатылады.
«Халық қатысатын бюджет» шеңберінде тұрғындардың талап-тілектері ескеріліп, 15 әмбебап балалар алаңшасы, 3 спорт алаңша салынады.
Сонымен қатар ауданның экономикалық әлеуетін көтеретін ірі жоба аудан аумағында «Бозарық» тамақ өнеркәсібі индустриалды аймағы салынуда.
Аумағы 132,9 гектарды құрайтын индустриялық аймақта тамақ өнеркәсібімен айналысатын, жалпы құны 29,5 млрд теңгені құрайтын 30 инвестициялық жоба жүзеге асырылады. Мұнда 1 жарым мыңға жуық жаңа жұмыс орны ашылады деп күтілуде.
