jetpisbai.kz Ұлы Дала жаңалықтары
Қазақстан Республикасы Төтенше жағдайлар министрлігінің 2026 жылғы 20 наурыздағы №123 бұйрығына сәйкес, Шымкент қаласының Төтенше жағдайлар департаменті шомылу маусымы кезеңінде азаматтардың қауіпсіздігін қамтамасыз ету және судағы жазатайым оқиғалардың алдын алу бағытында жүйелі жұмыстар атқаруда.
Қала аумағында суда жаппай демалу, туризм және спорт үшін 5 ресми орын белгіленген. Оның ішінде 3 орында шомылуға рұқсат етілген. Олар – Тоғыс су қоймасындағы «Райский пляж» демалыс орны, Бадам су қоймасындағы «Рахат Бадам» демалыс орны және Қошқар ата өзенінің бастауы.
Шомылу маусымына дайындық аясында демалыс аймақтарының иелерімен түсіндіру жұмыстары жүргізіліп, судағы қауіпсіздік талаптарына сәйкес демалыс орындарын жабдықтау мәселелері қаралды. Құтқару бөлімшелерінің дайындығы пысықталып, авариялық-құтқару жұмыстарын жүргізу бойынша оқу-жаттығулар ұйымдастырылды. Сонымен қатар, білім беру ұйымдарында судағы қауіпсіздік тақырыбында интерактивті және ашық сабақтар, практикалық іс-шаралар мен сынып сағаттары өткізілуді. Жалпы алғанда, мыңнан астам оқушы қауіпсіздік шаралары бойынша оқытылды.
Тұрғындарды ақпараттандыру мақсатында бұқаралық ақпарат құралдары мен әлеуметтік желілерде түсіндіру жұмыстары жүргізіліп, LED экрандар арқылы арнайы бейнероликтер көрсетілуде. Сондай-ақ, тұрғындардың ұялы телефондарына 112 қызметі арқылы қауіпсіздікке қатысты ескерту хабарламалары жолдануда.
Балалардың қауіпсіздігін қамтамасыз ету мақсатында әлеуметтік осал отбасылардан шыққан балаларды жүзуге үйрету жұмыстары да жалғасуда. Өткен жылы осы бағытта 11 меморандум жасалып, 1400-ден астам бала қамтылған болатын.
Департамент азаматтарды тек арнайы жабдықталған және рұқсат етілген орындарда ғана шомылуға, балаларды қараусыз қалдырмауға және қауіпсіздік талаптарын қатаң сақтауға шақырады.
Сонымен қатар, шомылу маусымы кезеңінде су айдындарында күнделікті профилактикалық рейдтер ұйымдастырылып, демалыс орындарында қауіпсіздік талаптарының сақталуына тұрақты бақылау жүргізілуде. Рейд барысында азаматтарға арнайы жадынамалар таратылып, рұқсат етілмеген орындарда шомылудың қауіптілігі жөнінде түсіндіру жұмыстары жүргізілуде. Бұл шаралар тұрғындардың қауіпсіздік мәдениетін арттыруға және судағы қайғылы оқиғалардың алдын алуға бағытталған.
Су айдындарындағы қауіпсіздік – әр азаматтың жауапкершілігі.
