jetpisbai.kz Ұлы Дала жаңалықтары
Шымкент қаласы әкімінің орынбасары Ерғали Білісбеков онлайн режимде 20-дан астам азаматты жеке мәселелері бойынша қабылдап, өтініштерін тыңдады.
Тұрғындар негізінен тұрғын үй, әлеуметтік қолдау, жұмыспен қамту және «Еңбек» мемлекеттік бағдарламасы шеңберінде жаңа бизнес идеяларды іске асыруға арналған мемлекеттік грант алуға байланысты мәселелерін жеткізді.
Е. Білісбеков әр тұрғынның мәселесін мұқият тыңдап, заң аясында шешу жолдарын түсіндірді.
Онлайн қабылдауда болған азаматтардың ішінде тұрғын үй кезегіне осыдан бір жыл бұрын тұрған немесе кезекке мүлдем тіркелмегендер де бар. Ерғали Дәулетбекұлы азаматтарға мемлекеттік тұрғын үй қорынан пәтерлер белгіленген тәртіппен кезек арқылы берілетіндігін атап өтті. Арендалық үйлер көпбалалы отбасыларға, халықтың әлеуметтік жағынан әлсіз топтары мен жұмыс істейтін жастарға қарастырылған. Сонымен қатар, «Шаңырақ 5-10-20», «7-20-25» жеңілдетілген несие бағдарламалары негізінде тұрғын үйге қол жеткізуге болады.
Қала әкімінің орынбасарына атаулы әлеуметтік көмек мәселелері бойынша да сұрақтар қойылды. Сәуір айынан бастап өтініштер электронды үкімет порталы арқылы қабылдануда.
Ерғали Білісбеков әр азаматқа өтініші бойынша толық жауап беріп, тиісті басқарма басшыларына өз құзыреті шеңберінде шешуге көмек көрсетуді тапсырды.
