jetpisbai.kz Ұлы Дала жаңалықтары
Бас ауырып, балтыр сыздай қалса бірінші кезекте дәрігерге жүгінетініміз, солардан жәрдем күтетініміз жасырын емес. Кейде ауру-дертіміз жанымызға қаттырақ батқанда сабырсызданып эмоцияға бой алдыратынымыз, тезірек маған қарай қоймады деп дәрігерлерге ренжитініміз, жекитініміз де рас. Алдына түрлі жағдайда келген жандардың қыл үстінде тұрған өмірлері әуелі Алланың қалауынша болса, Алладан кейін дәрігерлердің қолында. Жауапкершілігі де сол кісілердің мойынында.
Осынау ауыр да жауапты міндетті өздеріне кәсіп еткен ақ желеңділердің елдегі карантиндік режим жағдайында атқарып жатқан жұмыстары орасан. Індет өршіп, алқымнан алған былтырғы жағдайда отбасыларынан жырақта жүріп, кеселге шалдыққандармен тікелей қатынас жасап, өз өмірлерін қатерге тігіп күн-түн демей тынымсыз еңбек етті.
Қауіп-қатердің қайнаған қазанында жүріп өз өмірінен өзгенікін қымбат санаған жетісайлық біраз дәрігер бақилық та болды.
Бүгін Жетісай аудандық ауруханасының бастамасымен әлем халқын әбігерге салып, адамзат баласының жүрегіне үрей ұялатқан аты жаман індет – covid19 пандемиясынан қаза болған әріптестерін еске алуға арналған турнир өткізді. Рухтарына құран бағыштады.
Аудан әкімдігінің тікелей қолдауымер бастау алған шараның ашылу салтанатына Жетісай ауданы әкімінің орынбасары Серік Пірімбеков, «Nur Otan» партиясы Жетісай аудандық филиалы төрағасының бірінші орынбасары Әділхан Асауов, ауданның бас имамы Жорабай Дулатбаев, аудандық ардагерлер кеңесінің төрағасы Айтбай Махамбетов, аудандық дене шынықтыру және спорт бөлімінің басшысы Еркебұлан Сейдалиев пен №1 балалар мен жасөспірімдер спорт мектебінің директоры Ғабит Жанаев, ардагер спортшы Бақыт Жанбырбаев пен аудандық «Жастар ресурстық орталығы» КММ басшысы Нұрлыбек Мутаев, аудандық аурухана дәрігерлері қатысып, теңбіл доп шеберлеріне сәттілік тіледі.
Спорттың кіші футбол түрінен ұйымдастырылған турнирге Алматы, Шымкент қалаларымен қатар өзге де аудандардан 16 құрама іріктеліп, өзара мықтыларды анықтауда.
Ә дегеннен тартысты басталған турнирдің алғашқы кездесулерден бастап-ақ әрбір команда өздерінің жарысқа деген жігерлері мен үлкен дайындықпен келгендіктерін көрсетті.
Енді ашық турнирдің ақтық ойындары ертең, яғни, 15.07.2021 күні Жетісай қаласындағы Қ.Мұңайтпасов атындағы орталық стадионда өтеді.
