jetpisbai.kz Ұлы Дала жаңалықтары
Түркістан қаласы «Санитариялық-эпидемиологиялық бақылау басқармасының» басшысы Марат Байтүгелов тікелей эфирге кіріп, шаһардағы індет көрсеткіштері туралы баяндады.
Ақпаратқа сәйкес, қазіргі таңда карантин талабын өрескел бұзып, жүйелі түрде той жиын өткізген 6 қоғамдық тамақтану нысанына шұғыл хабарлама түскен. Оның 3-не жоспардан тыс тексеру жүргізіліп, заң бұзушылықтарды жою туралы санитариялық ұйғарымдар берілген. 3 қоғамдық тамақтану нысанының жұмысы уақытша сот шешімімен тоқтатылған, 1 нысанның жұмысын уақытша тоқтату бойынша сот ісі әлі қаралуда. ҚР Әкімшілік құқық бұзушылық кодексінің 425 бабының 1 — тармақшасы бойынша карантин талабын бұзғандарға шара қолданылуда. Статистика бойынша 558 (оның 18 әкімшілік жаза қолдану туралы қаулы шығару арқылы) айыппұл салынған. Оның ішінде жеке тұлғаға – 543, 11 — жеке кәсіпкерге, 1 — лауазымды тұлға мен 3 заңды тұлға. Сонымен қатар, жыл басынан бері 49 ұжымдасқан мерекелік іс-шара анықталған (44 қоғамдық тамақтану нысандарында, 5 үй жағдайында).
Ал, бүгінде індет жұқтырғандар саны 450-ді құраған. Симптомсыз тіркелгендер саны – 260, симптомды тіркелгендер саны — 190, жазылып шыққандар саны – 343 болса, медициналық бақылауда 107 науқас тіркелген. Пневмония диагнозымен 216 науқас тіркелген. Оның жазылып шыққандары 195, медициналық бақылауда -21.
Айта кететіні, алдағы 20-22 шілде аралығында «Құрбан айт» мерекесі күндері меншік нысанына қарамастан барлық ұйымдарда, жеке меншік үй иеліктерінде, медреселерде адамдар көп жиналатын іс-шаралар өткізуге тыйым салынған. Рұқсат етілмеген орындарда мал союға, мал сатуға да рұқсат етілмейді. Таңғы айт намазын мешіттерде ашық ауада 4 метр арақашықтықты сақтай отырып өткізу қажет. Құрбандық шалуды арнайы белгіленген мал сою орындарында жүзеге асыру керек және шалынған етті таратуға тартылған адамдар карантин талабын қатаң сақтау қажет.
