jetpisbai.kz Ұлы Дала жаңалықтары
Қазақстан полициясына 30 жыл толуына орай 30-дан астам ардагерге экскурсия ұйымдастырылды, деп хабарлайды облыстық полиция департаментінің баспасөз қызметіне сілтеме жасаған jetpisbai.kz ақпараттық агенттігі.
Түркістан облысының полиция қызметкерлері қылмыспен күресуден бөлек, еңбек жолында қайырымдылық жасау сынды игі іс-шараларда өздерінің белсенділіктерін таныта біледі.
Облыс аумағында «Ішкі істер органдарының құрылғанына 30 жылдық» мерейтойдың өтілуіне орай бастау алған «30 игі іс» қайырымдылық марафоны қазіргі таңда өз жалғасын табуда. Аталған мерекеге орай 30 игі іс шарасын бұл жолы арыстық полицейлер өткізді. Арыс аудандық полиция бөлімі бастығының бастамасымен тәртіп сақшылары бөлім қызметінен шекті жасынан зейнеткерлікке шыққан 35 ардагердің басын қосты. Ішкі істер органдарында жұмыс жасаған ардагерлермен өңірдің қасиетті жерлерін — Арыстан баб, Қожа Ахмет Яссауи кесенелерін саяхаттап, Керуен сарай кешенінде серуендеп, әңгіме дүкен құрды. Шара барысында ардагерлерге мұражай іші таныстырылып, ондағы түрлі жәдігерлердің тарихы жайлы баяндалды. Бұндай жиынға келгендер өздерінің ерекше сезімдерін айтып, әсерлерімен бөлісті. Сондай-ақ тәртіп сақшылары ардагерлерге арнап, дастархан жайды.
Келелі кездесуде бас қосқан зейнеткерлер: «Осындай игі шарада бізді елеусіз қалдырмаған полицейлерге алғыс білдіреміз. Еңбек жолында жұлдыздарың жана берсін. Жұмыстарыңа сәттілік тілейміз!» деп өздерінің ризашылықтарын білдіріп, мәз-мейрам болып тарқасты.
Алдағы уақытта да «30 игі іс» аясында көптеген іс-шаралар өткізуге белсенділер даяр. Себебі бұл марафон елдің тәуелсіздік жылдарындағы жеткен жетістіктердің құндылығын көрсетіп қана қоймай, қайырымды істер арқылы әлемнің жақсы жаққа өзгеруіне кепілдік бере алады.
