jetpisbai.kz Ұлы Дала жаңалықтары
Егемен еліміздің тұрақтылығы мен тыныштығы негіздерінің бірі – Қазақстан полициясының құрылғанына 30 жыл толып отыр. Ішкі істер органдарының қызметкерлері ел саясатының қолдаушысы, халқының қамқоршысы болып саналады. Олар қауіпсіздікті ойлап қана қоймай, түрлі шараларда белсенді. Үнемі халықтың шын жанашыры. Полицейлер игі іс-шараларды ұйымдастыруда да өздерінің қамқоршы екендіктерін көрсете білді.
Арыс аудандық полиция бөлімінің бастығы полиция подполковнигі Алмас Мырзахметов және полиция қызметкерлерінің бастауымен ауқымды шара ұйымдастырылды. Іс-шара Т.Тәжібаев атындағы отбасы үлгісіндегі балалар ауылында өтті. Шараның басты мақсаты – «1 маусым – Балаларды қорғау күні» мерекесіне орай, балаларға қуаныш сыйлау. Полиция қызметкерлері балаларға мерекелік концерт қойып, соңы қайырымдылық шараға ұласты. Тәртіп сақшылары балалардың көңілін аулап, оларға самокат, скейтборд сыйлыққа берді. Шара соңында Алмас Мырзахметов: «Құрметті балғындар, сіздерді 1 маусым-Халықаралық балаларды қорғау күнімен құттықтаймын! Елімізде жас өскін ұрпағымыз аман болсын! Барлығыңызға ашық аспан, бейбіт өмір, сәбилерге бақытты балалық шақ, әрқашанда сыңғырлаған күлкі тілейміз. Әр уақытта дендері сау болып, Отанымыздың мақтанышы болуларына тілектеспіз! Жұртымыз, еліміз тыныш, деніміз сау, басымыз аман, жұмысымыз жемісті болсын!» — деді ол.
Сонымен қатар, Түркістан қалалық полиция бөлімінің қызметкерлері де «1 маусым – Балаларды қорғау күні» мерекесін ерекше атап өтті. Олар балаларды Керуен сарай көп функционалдық туристік кешеніне шақырып, саяхат ұйымдастырды. Шара кезінде өнерлі балалар өздерін жан-жақты көрсетті. Олар жеке әндер шырқап, хормен ән айтып, домбырамен күй тартты. Полицейлер балалардың өнерлеріне дән риза болды. Шара соңында тәртіп сақшылары балаларды мерекемен құттықтап, оларға ізгі тілектерін білдірді: «Құрметті балалар, достар! Сіздерді бүгінгі 1-маусым балаларды қорғау күнімен құттықтаймын! Еліміздегі жас өскелең ұрпақ аман болсын! Еліміз тыныш, деніміз сау, басымыз аман, жұмысымыз жемісті болсын!» — деп атап өтті.
