jetpisbai.kz Ұлы Дала жаңалықтары
Бүгін “Түркістан сарайында” сұлулық пен нәзіктік салтанат құрды десек болады. Талдырмаш мүсін, аққу құстай әсемдік, сырбаздық концерт залын баурап алды. Шіркін, сұлу өнердің костюмдерінің өзі бір төбе ғой. Бұл бекзат өнерді дәріптеген “Мейір” балет мектебінің 25 жылдық “Ширек ғасыр шыңдары” атты мерекелік концерті еді. Республикаға танымал мектептің мерейтойына елімізге белгілі өнер ұжымдары, “Гүлдер” ансамблі, Т.Жүргенов атындағы Қазақ ұлттық академиясы ұжымынан өнерпаздар келіп, ән-биден шашу шашты.
Сондай-ақ, Шымкент қаласы білім басқармасының басшысы Нұргүл Шәмшиева мен Мәдениет, тілдерді дамыту және архивтер басқармасының басшысы Бауыржан Орынтаев қатысып, құттықтау сөз сөйледі. Басқарма басшылары жәй құттықтап келмепті, қиын-қыстау кезеңде, өнерді сүйген арда азамат Болат Атаханұлы негізін қалап кеткен балет мектебін шашыратпай, игі істі жалғастырып отырған жары, мектептің директоры Ламила Тайкеноваға ҚР Оқу-ағарту министірінің аманаты деп, “Еңбек ардагері” медалін ұсынды.
-Биші болу үлкен қажырды талап етеді. Әсіресе балет өнерінің жүгі ауыр. Мына концерт көп еңбектің нәтижесі. “Мейір” мектебінің еңбегі тек қаламызда ғана емес, республика көлемінде бағасын алған. Мектеп ұжымына барша ата-аналардың атынан алғыс айтамын, — деді Нұргүл Ақылбекқызы.
Шымкенттегі балет мектебінің негізін қалаушы- хореограф, Қазақстанның еңбек сіңірген өнер қайраткері Болат Атаханұлы Мейірбеков. 2011 жылы дүниеден өткен тұлғаның ісін жұбайы Ламила Тайкенқызы жалғастырды. «Ширек ғасыр шыңдары» атты мерекелік кешті тамашалауға арнайы шақырту алған өнер майталмандары керемет жетістікке жеткен балет мектебінің ұжымына шығармашылық табыс тіледі.
Ламила Мейрбекова, «МEIR» балет мектебінің директоры: «25 жыл бір бозбаланың өмірі, тез өтіп кетті. Осындай жетістікке біз ұжым болып, серіктестеріміз, демеушілеріміз, тәрбиеленушілер, олардың ата-аналарының арқасында жетіп отырмыз. Бөкеңнің еңбегі орасан. Ол кісінің аманатын арқалап жүрміз. Мерей тойға арнайы Алматы, Астанадан келген Болат Атаханұлының достарына, әріптестеріне алғысым шексіз».
Түрлі халықаралық конкурстардың жеңімпаздары «МEIR» балет мектебі тәрбиеленушілерінің алар белестері алда. Ол шыңдарға жетуге ұжымға серіктестері, демеушілер, ата-аналар әрқашан қолдау көрсетуде.
Би өнері ішкі рухани әлемді ашады, адамды сұлулыққа тәрбиелейді, игі қасиеттерді оятады. Осындай сұлу өнерді насихаттап жүрген ұжымға еңбектеріңіз жана берсін дегіміз келеді.
