jetpisbai.kz Ұлы Дала жаңалықтары
Ордабасы ауданының әкімі Азат Оралбаевтың төрағалығымен Темірлан елді мекенінде құрылысы жүргізіліп жатқан кредиттік тұрғын үйлерді іске қосу және оны сату тетіктерін талқылауға арналған жұмыс жиыны өтті, – деп хабарлайды Jetpisbai.kz тілшісі. Жиын тұрғындарды қолжетімді баспанамен қамту бағытындағы атқарылып жатқан жұмыстарды үйлестіруге арналды.
Жиынға ауыл округтерінің әкімдері, аудандық тұрғын үй-коммуналдық шаруашылық бөлімі, білім бөлімі, орталық аурухана, ішкі саясат, құрылыс және сәулет бөлімі басшылары, сондай-ақ «Отбасы банк» АҚ Түркістан облыстық филиалы директорының орынбасары қатысты.
Мәжілістің негізгі мақсаты – Темірлан аумағында салынып жатқан тұрғын үйлерді халыққа тиімді әрі қолжетімді түрде ұсыну, сондай-ақ кредиттік тұрғын үйлерді сату тетіктерін түсіндіру және оларды іске асыру жолдарын нақтылау болды.
Жиын барысында тиісті бөлім тарапынан «Батсу-Водоканал» ЖШС және «CK ABU GROUP» ЖШС тарапынан жүргізіліп жатқан 2 қабатты тұрғын үй құрылыстарының қазіргі жағдайы таныстырылды. Темірлан елді мекеніндегі 70 гектар алқапта 32 пәтерлік (2 қабатты) тұрғын үйлердің және 120 пәтерлік тұрғын үй блоктарының құрылысы жоспарға сай жүргізіліп жатқаны айтылды.
Құрылыс нысандарында ішкі әрлеу, электр желілерін және ауыз су жүйесін тарту, сондай-ақ фасад жұмыстары белсенді жүріп жатыр. Қазіргі уақытта құрылыс алаңында 160-қа жуық жұмысшы мен 4 техника жұмылдырылған.
«Отбасы банк» өкілі жиналғандарға тұрғын үйлерді кредиттік негізде сату тетіктерін, қатысу шарттарын және мемлекеттік бағдарламалар аясында ұсынылатын мүмкіндіктерді кеңінен түсіндірді.
Жиын қорытындысында аудан басшысы Азат Оралбаев ауыл округі әкімдеріне және жауапты бөлімдерге тұрғындар арасында түсіндіру жұмыстарын күшейту, кредиттік тұрғын үй бағдарламаларына қатысу тәртібін кеңінен жеткізу, кезекте тұрған азаматтардың деректерін нақтылау, сондай-ақ құрылыс барысын тұрақты бақылауда ұстау жөнінде нақты тапсырмалар берді. Сонымен қатар Темірлан елді мекенінде тұрғын үйлер салу және оларды халыққа қолжетімді түрде ұсыну бағытындағы бірлескен жұмыстар жалғаса беретінін атап өтті.
КРЕДИТТІК ТҰРҒЫН ҮЙЛЕРДІ САТУ БОЙЫНША ҚЫСҚАША НҰСҚАУЛЫҚ
1️⃣ Тұрғын үйлердің жалпы сипаттамасы
Темірлан елді мекенінде 2 қабатты жаңа тұрғын үйлер салынып жатыр.
Пәтерлер саны: 32 пәтер және 120 пәтерлі тұрғын блоктар.
Пәтер түрлері:
➖ 1 бөлмелі – 34–45 м²
➖ 2 бөлмелі – 50–65 м²
➖ 3 бөлмелі – 66–87 м²
1 шаршы метрдің аудандар бойынша бағасы: 260 000 теңге
Кредиттік сату құны: 208 000 теңге/м² (ескертпе).
2️⃣ Кредиттік тұрғын үйді кім сатып ала алады?
Пәтерді сатып алу құқығы тұрғын үй кезегінде тұрған азаматтарға және Түркістан облысының кез келген азаматына беріледі.
Бірінші кезекте:
▫️ ҰОС ардагерлері
▫️ Жетім балалар
▫️ Көпбалалы аналар мен отбасылар
▫️ 1 және 2 топ мүгедектері
▫️ Мүгедек баласы бар отбасылар
▫️ Жеңілдігі бар ардагерлер
▫️ Жесірлер
3️⃣ Несиелеу бағдарламалары
2–10–20 бағдарламасы
➖ Пайыздық мөлшерлеме: 2%
➖ Бастапқы жарна: 10%
➖ Мерзімі: 19 жылға дейін
➖ Табыс талабы: отбасы мүшесіне шаққандағы орташа табыс
5 төменгі күнкөріс деңгейінен аспау керек
(2025 жылы – 231 140 теңге)
5–10–20 бағдарламасы
➖ Пайыздық мөлшерлеме: 5%
➖ Бастапқы жарна: 10%
➖ Мерзімі: 20 жылға дейін
➖ Табыс талабы: отбасы мүшесіне шаққандағы табыс
6 төменгі күнкөріс деңгейінен аспау керек
(2025 жылы – 277 368 теңге)
4️⃣ Пәтерге қойылатын талаптар
➖ Жаңа тұрғын үй (2 жылдан аспаған)
➖ Ауданы 84 м²-ден аспауы тиіс
➖ Сапалы материалдармен салынған
➖ Жоба сараптамадан өткізілген
5️⃣ Қатысушыға қойылатын негізгі талаптар
➖ orken.otbasybank.kz сайтында тұрғын үй кезегінде тұру
➖ Соңғы 6 айда тұрақты зейнетақы аударымдарының болуы
➖ Несие тарихының оң болуы
➖ Табыс деңгейі бағдарлама талаптарына сәйкес болуы
➖ Бастапқы жарнаны (кемінде 10%) төлеу мүмкіндігі
6️⃣ Үйді сатып алу механизмі
➖ Азамат тұрғын үй кезегінде тұрады
➖ Құжаттар банкке өткізіледі
➖ «Отбасы банк» табыс пен несие тарихын тексереді
➖ Несие мақұлданады
➖ Пәтер бөлінеді
➖ Келісімшарт жасалып, азамат жаңа баспанаға қоныстанады
© Jetpisbai.kz
