jetpisbai.kz Ұлы Дала жаңалықтары
Басқармалар үйінің мәжіліс залында Сауран ауданының әкімі Мақсат Таңғатаровтың төрағалығымен мәдениет, тілдерді дамыту, дене шынықтыру және спорт бөлімі мен оған қарасты коммуналдық мемлекеттік мекеме басшыларының 2025 жылдың 11 айында атқарған жұмыстары бойынша есеп беру жиыны өтті, – деп хабарлайды Jetpisbai.kz тілшісі.
Ресми кездесуге аудан әкімінің орынбасары Бақытжан Букебаев, аудандық Қоғамдық кеңестің төрағасы Серікбай Оразбеков, сала қызметкерлері және бұқаралық ақпарат құралдарының өкілдері қатысты.
Күн тәртібіне сәйкес, алдымен мәдениет, тілдерді дамыту, дене шынықтыру және спорт бөлімінің басшысы Жанар Жаңабекқызы 2025 жылдың 11 айында атқарылған жұмыстар туралы баяндама жасады. Баяндамасында сала бойынша жүзеге асырылған жобалар, өткізілген мәдени-көпшілік және спорттық іс-шаралар, сондай-ақ алдағы кезеңге жоспарланған міндеттер жан-жақты қамтылды.
Сонымен қатар Тілдерді оқыту және дамыту орталығының директоры Арман Сансызбайұлы орталықтың есептік кезеңдегі қызметі жөнінде баяндап, мемлекеттік тілдің қолдану аясын кеңейту бағытында атқарылған жұмыстарға тоқталды.
Келесі кезекте мәдениет үйінің директоры Ердәулет Төлегенұлы мәдениет саласында жүзеге асырылған жұмыстарды таныстырды. Ал аудандық кітапханалар жүйесінің 2025 жылдың 11 айындағы қызметі туралы Құндызай Ажмаханқызы баяндама жасады. Сондай-ақ бұқаралық және спорт түрлерін дамыту клубының директоры Нұрсұлтан Камалбекұлы мен Сауран спорт клубының директоры Еркін Ерсінұлы спорт саласында қол жеткізілген нәтижелер мен жетістіктер жөнінде есеп берді.
Жиын барысында қатысушылар тарапынан қойылған сұрақтарға сала басшылары нақты жауап беріп, өзекті мәселелер жан-жақты талқыланды. Мәжілісті қорытындылаған аудан басшылығы мәдениет пен спорт салаларын дамыту бағытындағы жұмыстарды жүйелі түрде жалғастыру, көрсеткіштерді арттыру және халыққа көрсетілетін қызмет сапасын жақсарту жөнінде нақты тапсырмалар жүктеді.
Жиналыс соңында мәдениет пен спорт саласының дамуына елеулі үлес қосып, өз қызметінде жоғары нәтижелерге қол жеткізген сала үздіктері Сауран ауданының әкімі Мақсат Таңғатаровтың Алғыс хаттарымен марапатталды. Аудан басшысы марапат иелеріне алғысын білдіріп, алдағы жұмыстарына табыс тіледі.
© Jetpisbai.kz
