jetpisbai.kz Ұлы Дала жаңалықтары
Жетісай ауданының әкімі Серік Үсенұлы Мамытовтың төрағалығымен аппарат мәжілісі өтті, – деп хабарлайды Jetpisbai.kz тілшісі. Жиынға аудан әкімінің орынбасарлары мен аудандық полиция бөлімінің басшысы Мұрат Ермеков, аудандық аумақтық кірістер басқармасының басшысы Серік Жасұзақов, білім бөлімі басшысының міндетін уақытша атқарушы Шоқан Адайбеков, қала, кент, ауылдық округ әкімдері мен бөлім басшылары, сондай-ақ «ҚазСуШар» РМК Түркістан өндірістік филиалы мен төтенше жағдайлар бөлімінің өкілдері қатысты.
Күн тәртібінде бекітілген мәселелер бойынша жауын-шашын салдарынан көшелерді су басуының алдын алу жұмыстары туралы Жетісай қаласының әкімі Нұрлыбек Бахтияров пен Асықата кентінің әкімі Нұралы Жолдасбек, аудандық төтенше жағдайлар бөлімінің бас маманы Қанжар Досаев баяндама жасады. Ал аудандық экономика және қаржы бөлімінің басшысы Өмірзақ Дүйсебаев пен аудандық аумақтық кірістер басқармасының басшысы Серік Жасұзақов қаржы қаражатының игерілуі мен бюджеттік түсімдердің орындалу барысына жан-жақты тоқталды.
Сонымен қатар мәжіліс барысында қысқы вегетациялық жұмыстардың орындалуы мен әскерге шақыру науқанының барысы, «Таза Қазақстан» жалпыхалықтық экологиялық акциясының жүзеге асырылуы және жылыту маусымының өту жағдайы кеңінен талқыланды. Ауыл шаруашылығы саласында су үнемдеу технологияларын енгізу бойынша атқарылып жатқан жұмыстар жөнінде тиісті сала басшылары баяндама жасап, алдағы жоспарларымен таныстырды және қойылған сұрақтарға жауап берді.
Мәжіліс соңында аудан басшысы Серік Үсенұлы Мамытов атқарылған жұмыстарға талдау жасап, алдағы кезеңге нақты міндеттер жүктеді. Орын алған кемшіліктерді жою бойынша нақты ұсыныстар айтып, әр салаға уақыт межесін белгіледі. Сондай-ақ жауапты басшыларға тапсырмалардың орындалуын қатаң бақылауда ұстауды тапсырып, ауданның әлеуметтік-экономикалық дамуына бағытталған жұмыстарды жүйелі түрде жалғастыру қажеттігін атап өтті.
© Jetpisbai.kz
