jetpisbai.kz Ұлы Дала жаңалықтары
Сарыағаш ауданында «Таза Қазақстан» жалпыұлттық бастамасы аясында көктемгі көшет отырғызу жұмыстары жүргізілді. Аталған шаралар Мемлекет басшысы Қасым-Жомарт Тоқаевтың өңірлерді абаттандыру және көгалдандыру жөніндегі тапсырмаларына сәйкес іске асырылуда.
Іс-шара барысында республикалық маңызы бар А-15 автожолы бойындағы, болашақта жасыл желек саябаққа айналдыру жоспарланған 4 гектар аумаққа 1000 түп ағаш көшеті отырғызылды. Бұл игі бастамаға аудан әкімі Арман Абдуллаев, әкімдік қызметкерлері, жастар мен еріктілер белсене қатысып, қоршаған ортаны қорғауға өз үлестерін қосты. «Атаңнан мал қалғанша, тал қалсын» қағидасын ұстанған аудан тұрғындары көгалдандыру жұмыстарына ұйымшылдықпен атсалысты.
Сонымен қатар аудан көлемінде кең ауқымды сенбілік ұйымдастырылып, тазалық жұмыстары жүргізілді. Шара барысында республикалық және облыстық маңызы бар автожолдар мен ішкі көшелер бойындағы қоқыстар жиналып, арық-атыздар тазартылды, шөптер орылып, сырлау және әктеу жұмыстары атқарылды. Жалпы сенбілікке 1980 адам қатысып, 20 техника жұмылдырылды. Нәтижесінде 30 тонна қоқыс арнайы орындарға шығарылды. Бұдан бөлек, 65 көше, 30 аялдама, 15 шақырым жаяу жүргіншілер жолы, 17 саябақ пен сквер, 17 спорт алаңшасы, 55 шақырым арық-атыз және 9 шақырым ирригациялық жүйе тазартылды.
Апта сайын ұйымдастырылатын сенбілік шаралары ауданның санитарлық жағдайын жақсартуға және тұрғындардың экологиялық мәдениетін қалыптастыруға оң әсерін тигізуде. Әрбір тұрғынның өз ауласының тазалығына жауапкершілікпен қарауы – өңірдің көркеюіне қосылған маңызды үлес.
Аудан аумағында жүзеге асып жатқан бұл экологиялық шаралар тек көгалдандырумен шектелмей, ұзақ мерзімді табиғи тепе-теңдікті сақтауға бағытталған жүйелі жұмыс ретінде жалғасын табады. Мамандардың айтуынша, отырғызылған ағаш көшеттерінің жерсінуін қамтамасыз ету үшін арнайы суару жүйелері қарастырылып, агротехникалық күтім кезең-кезеңімен жүргізіледі. Бұл өз кезегінде жасыл белдеудің тұрақты қалыптасуына мүмкіндік береді.
Сонымен қатар, экологиялық мәдениетті қалыптастыру мақсатында тұрғындар арасында түсіндіру жұмыстары күшейтілуде. Әсіресе, жастар мен мектеп оқушыларының қатысуымен ағаш отырғызу, айналаны тазарту сияқты акциялар жиі ұйымдастырылып, табиғатты қорғауға деген жауапкершілік сезімі арттырылып келеді. Мұндай бастамалар қоғамның экологиялық санасын көтеруге айтарлықтай ықпал етуде.
Сенбілік барысында атқарылған жұмыстар инфрақұрылымдық тазалықтың да маңызын көрсетті. Қоғамдық орындар мен жол бойларындағы ретсіз қоқыстардың жиналуы, арық жүйелерінің ашылуы және санитарлық аймақтардың ретке келтірілуі ауданның жалпы келбетін жақсартуға оң әсерін беріп отыр. Бұл шаралар тұрғындардың өмір сүру сапасын арттыруға да тікелей ықпал етеді.
Алдағы уақытта Сарыағаш ауданында «Таза Қазақстан» бастамасы аясындағы жұмыстар тұрақты түрде жалғасып, әрбір ауылдық округ пен елді мекенде жүйелі экологиялық акциялар өткізілмек. Осындай бірлескен еңбектің нәтижесінде ауданның жасыл желегі көбейіп, табиғаты көркейген, экологиялық мәдениеті жоғары өңір қалыптасуы көзделіп отыр.
