jetpisbai.kz Ұлы Дала жаңалықтары
Түркістан облысы Сайрам ауданындағы «Наурыз-5» кәсіпорны алғаш рет Қытайға өнім экспорттауға дайындалуда. «Korkem» брендімен танылған отандық өндіруші табиғи шырындар мен тосаптарды шетел нарығына шығармақ.
Кәсіпорын басшысы Джурат Игембаевтың айтуынша, қытайлық серіктестермен жасалған алғашқы келісімшарт аясында төлем қаражаты түсіп үлгерген. Енді алдағы күндері өнімдер Қытайға жөнелтіледі. Шетелдік мамандар әсіресе өнімнің табиғилығы мен дәмдік сапасына жоғары баға берген.
Ақсукент ауылында орналасқан өндіріс орнында бүгінде томат пастасы, кетчуп, тосап және жеміс шырындарының 60-қа жуық түрі шығарылады. Зауыт жылына 2400 тоннаға дейін өнім өндіруге қауқарлы және 50 адамды тұрақты жұмыспен қамтып отыр.
Кәсіпорын негізінен Сайрам ауданында өсірілген жеміс-жидек пен көкөністі өңдейді. Өндірушінің айтуынша, өнім құрамында химиялық қоспалар қолданылмайды. Шикізат жергілікті шаруалардан сатып алынады, ал өндіріс барысында тазалық пен сапа талаптарына ерекше көңіл бөлінеді.
Қазіргі таңда кәсіпорын Қытаймен қатар басқа да шетелдік нарықтарға шығу мүмкіндігін қарастырып жатыр. Жақын уақытта Моңғолиядан келетін мамандар өнім сапасымен танысып, ынтымақтастық мәселесін талқыламақ.
Барлық өнім МемСТ талаптарына сәйкес сертификатталған. Мамандар мұндай өндірістер ауыл шаруашылығы өнімдерін терең өңдеуді дамытып қана қоймай, өңір экономикасының өсіміне және қазақстандық өнімнің экспорттық әлеуетін арттыруға үлес қосатынын атап өтеді.
© Jetpisbai.kz
