jetpisbai.kz Ұлы Дала жаңалықтары
Бәйдібек ауданындағы Алмалы елді мекеніне табиғи газ берілді. Салтанатты шараға арнайы қатысқан аудан әкімінің міндетін атқарушы Нұрпеис Ақбаев тұрғындардың қуанышымен бөлісіп, ізгі тілегін білдірді. Жиынға ауыл тұрғындары, жобаны жүзеге асырған мердігер мекеме өкілдері және «QazaqGaz Aimaq» АҚ Түркістан өңірлік филиалының өкілдері қатысты.
Ауылға тартылған газ құбырының ұзындығы — 9 шақырым. Қазіргі таңда аудандағы 41 елді мекен көгілдір отынмен қамтылған. Биыл өңірдегі Қаратас, Тұрақты, Қошқарата, Кеңсай, Ақтас, Шұқыршақ елді мекендерін газдандыру жұмыстары жүргізілуде. Бұл жобалар толық іске асқан жағдайда, Бәйдібек ауданы 100 пайыз табиғи газбен қамтылатын болады.
Табиғи газдың Алмалы ауылына жеткізілуі тұрғындардың тұрмыс сапасын жақсартуға айтарлықтай ықпал етеді. Енді ауыл халқы көмір мен отынға тәуелділікті азайтып, үйлерін экологиялық әрі қауіпсіз энергия көзімен жылыту мүмкіндігіне ие болып отыр.
Сонымен қатар газдандыру жұмыстары ауылдағы әлеуметтік инфрақұрылымның дамуына да серпін береді. Мектеп, медициналық пункт және басқа да әлеуметтік нысандардың жылыту жүйесін жаңарту арқылы олардың жұмыс тиімділігі арта түседі.
Жобаны жүзеге асыру барысында қауіпсіздік талаптарына ерекше мән беріліп, тұрғындарға газды дұрыс пайдалану бойынша түсіндіру жұмыстары жүргізілуде. Бұл төтенше жағдайлардың алдын алуға және көгілдір отынды ұқыпты пайдалануға мүмкіндік береді.
Алдағы уақытта аудан бойынша газдандыру жұмыстары толық аяқталған соң, Бәйдібек өңірі табиғи газбен 100 пайыз қамтылған аудандар қатарына қосылып, тұрғындардың өмір сүру сапасы жаңа деңгейге көтеріледі деп күтілуде.
