jetpisbai.kz Ұлы Дала жаңалықтары
Шымкент қаласында санитариялық-эпидемиологиялық және ветеринариялық қауіпсіздікті қамтамасыз ету мақсатында кенелерге, масаларға, кеміргіштерге және шегірткелерге қарсы кешенді өңдеу жұмыстары жалғасуда. Бұл туралы Өңірлік коммуникациялар қызметі алаңында өткен брифинг барысында Шымкент қаласының ауыл шаруашылығы және ветеринария басқармасы басшысының орынбасары Базарбеков Қайрат Мейрханұлы айтты.
Жыл сайын көктем және күз мезгілдерінде жүргізілетін кенеге қарсы залалсыздандыру шаралары биыл да жоспарға сай жүзеге асырылды. Алғашқы кезең 26 наурыз бен 25 мамыр аралығында толық аяқталып, 152 мыңнан астам ауыл шаруашылығы жануарлары өңделді. Сонымен қатар 4,6 миллион шаршы метрден астам қора-жайлар, саябақтар мен гүлзарлар аумағында залалсыздандыру жұмыстары жүргізілді. Бұл жұмыстарға арнайы техникамен жабдықталған 6 бригада және 18 маман тартылды.
Биылғы бес айда қалада Конго-Қырым геморрагиялық қызбасы тіркелмеген. Дегенмен кене шағу жағдайымен 475 адам медициналық көмекке жүгінген. Мамандардың мәліметінше, олардың басым бөлігі басқа өңірлерде мал шаруашылығымен айналысу немесе демалыс кезінде кене шағуына ұшыраған.
Қалада масаларға қарсы дезинсекциялық шаралар да қарқынды жүргізілуде. Бұл мақсатқа 30 маман мен 20 арнайы техника жұмылдырылған. Өңдеу жұмыстары саябақтарда, өзен-көл арналары мен гүлзарлар аумақтарында кезең-кезеңімен жүргізіліп жатыр.
Сонымен қатар сәуір айында кеміргіштерге қарсы көктемгі дератизация толық аяқталды. Нәтижесінде кеміргіштерден зардап шеккендер саны өткен жылмен салыстырғанда айтарлықтай азайған. Мамандар тұрғындар мен кәсіпкерлерді өз нысандарында санитариялық өңдеу жұмыстарын уақытылы жүргізуге шақырады.
Сонымен қатар, залалсыздандыру жұмыстары тек ауылдық аумақтармен шектелмей, қала ішіндегі қоғамдық кеңістіктерді де қамтиды. Саябақтар, демалыс аймақтары, балалар ойын алаңдары мен су арналарының маңында зиянкестердің көбеюіне жол бермеу үшін арнайы мониторинг тұрақты түрде жүргізілуде. Бұл шаралар тұрғындардың жаз мезгіліндегі қауіпсіз демалысын қамтамасыз етуге бағытталған.
Мамандардың айтуынша, зиянкестерге қарсы күрестің тиімділігі тек мемлекеттік шараларға ғана емес, тұрғындардың өз жауапкершілігіне де байланысты. Аулалар мен жеке аумақтарды таза ұстау, қоқысты уақытылы шығару және үй жанындағы су жиналатын жерлерді болдырмау маса мен басқа да жәндіктердің көбеюін айтарлықтай азайтады.
