jetpisbai.kz Ұлы Дала жаңалықтары
Шымкент қаласында еліміз бойынша алғаш рет жедел медициналық жәрдем қызметкерлерін интеллектуалды смарт-бейнежетондармен жабдықтау жобасын жүзеге асыру толық аяқталды. Жоба медициналық персоналдың қауіпсіздігін арттыруға және шұғыл медициналық көмек көрсету барысын жетілдіруге бағытталған.
Шымкент қаласының әкімі Ғабит Сыздықбеков және «Қазақтелеком» АҚ басқарма төрағасы Бағдат Мусин жедел жәрдем бригадаларына арнайы жабдықтарды табыстап, осылайша жүйенің қаладағы шұғыл әрекет ету қызметтерінде практикалық қолданысы басталды.
Жоба қалалық жедел медициналық жәрдем станциясы мен «Қазақтелеком» АҚ бірлескен жұмысы нәтижесінде жүзеге асырылып отыр. Медициналық бригадаларға жалпы саны 240 смарт-бейнежетон берілді. Жүйені орнату, баптау және жаппай пайдалануға енгізу бойынша барлық жұмыс толық орындалды.
Айта кету керек, толық іске қосылуының алдында жоба үш ай пилоттық режимде жұмыс істеді. Оның нәтижесі цифрлық шешімнің тиімділігін көрсетіп отыр.
Смарт-бейнежетондар шақырту кезіндегі іс-әрекеттерді жазып алуға, төтенше жағдайлар туындаған кезде дабыл сигналдарын жіберуге, сондай-ақ, деректерді орталықтандырылған түрде сақтау мен өңдеуге мүмкіндік береді. Бұл технология медициналық қызметкерлердің қауіпсіздігін арттыруға, олардың құқығын қорғауға және даулы жағдайлар туындаған кезде нақты дәлелдер базасын қалыптастыруға бағытталған.
Жүйе қазіргі уақытта штаттық режимде жұмыс істеп тұр және қаланың жедел жәрдем бригадалары барлық құрылғыны белсенді пайдаланып келеді. Смарт-бейнежетондарды енгізу Шымкент қаласының денсаулық сақтау саласын цифрлық трансформациялау жолындағы маңызды қадамдардың бірі болып табылады.
Жобаның енгізілуі жедел медициналық қызметтің ашықтығы мен жауапкершілігін арттыруға да ықпал етеді. Бейнежетондар арқылы шақырту кезіндегі әрекеттер нақты тіркеліп, қызмет көрсету сапасын бағалауға мүмкіндік беретін объективті деректер базасы қалыптасады.
Сонымен қатар мұндай цифрлық шешімдер медицина қызметкерлері мен пациенттер арасындағы өзара түсіністікті күшейтіп, даулы жағдайлардың алдын алуға көмектеседі. Бұл өз кезегінде шұғыл көмек көрсету процесінің тиімділігін арттырады.
Жүйенің орталықтандырылған деректермен жұмыс істеуі қалалық жедел жәрдем қызметін басқаруды жеңілдетіп, талдау және жоспарлау жұмыстарын сапалы деңгейге көтереді. Алдағы уақытта жиналған деректер негізінде қызмет көрсету алгоритмдерін жетілдіру мүмкіндігі қарастырылуда.
