jetpisbai.kz Ұлы Дала жаңалықтары
Өңірлік коммуникациялар қызметі ақпарат алаңында өткен брифинг барысында Шымкент қаласында міндетті әлеуметтік медициналық сақтандыру жүйесі аясында атқарылған жұмыстар қорытындыланды.
Бүгінде қалада МӘМС шеңберінде 174 медициналық ұйым халыққа қызмет көрсетеді. Оның ішінде 34-і мемлекеттік, қалғаны жекеменшік медициналық мекемелер. Барлығы Қормен жасалған келісімшарт негізінде жұмыс істеп, көрсетілген қызмет көлемі мен сапасына қарай қаржыландырылады.
Биылғы жылдың алғашқы бес айында тұрғындарға 4 миллионға жуық консультациялық-диагностикалық қызмет көрсетілген. Сонымен қатар 55 мыңға жуық пациент стационарлық ем қабылдаса, 16 мыңға жуық адам күндізгі стационар қызметін пайдаланған. Бұл қызметтердің басым бөлігі МӘМС қаражаты есебінен қаржыландырылды.
Медициналық оңалту бағыты да қарқынды дамып келеді. Қаладағы 30-ға жуық медициналық ұйымда көрсетілетін оңалту қызметін бес айда 7 мыңға жуық азамат алған. Әсіресе инсульттен кейінгі, кардиохирургиялық операциялардан соңғы және созылмалы аурулары бар пациенттер үшін бұл көмектің маңызы зор.
Қазіргі таңда Шымкентте 1 миллион 78 мыңнан астам адам МӘМС жүйесінде сақтандырылған. Бұл қала халқының шамамен 85 пайызын құрайды. Мамандардың айтуынша, жүйенің басты мақсаты – тұрғындардың сапалы әрі қолжетімді медициналық көмек алуына жағдай жасау.
МӘМС жүйесінің кеңеюі медициналық қызметтердің тек қолжетімділігін ғана емес, олардың сапасын арттыруға да ықпал етуде. Бәсекелестік ортада жұмыс істейтін медициналық ұйымдар пациенттерге қызмет көрсету стандарттарын жақсартып, заманауи диагностикалық және емдеу әдістерін енгізуге ұмтылуда.
Сонымен қатар алғашқы медициналық-санитарлық көмек деңгейінде профилактикалық шараларға ерекше көңіл бөлінуде. Бұл аурулардың асқынуын алдын алуға, ерте диагностика жүргізуге және тұрғындардың жалпы денсаулық көрсеткішін жақсартуға мүмкіндік береді.
Мамандардың айтуынша, сақтандыру жүйесі арқылы қаржыландыру тетіктерінің ашықтығы медициналық мекемелердің жауапкершілігін күшейтеді. Көрсетілген қызмет сапасы мен көлеміне қарай қаржыландыру енгізілуі жүйенің тиімділігін арттырып отыр.
Жалпы алғанда, МӘМС аясындағы реформалар Шымкент қаласында денсаулық сақтау саласын жаңа деңгейге көтеріп, тұрғындардың медициналық көмекке тең және тұрақты қолжетімділігін қамтамасыз етуге бағытталған.
