jetpisbai.kz Ұлы Дала жаңалықтары
Шымкент қаласындағы №2 Оқушылар сарайының дендросаябақ аумағында орналасқан дарынды балаларға арналған жазғы лагері жұмысын жалғастыруда.
Бұл лагерь – Мемлекет басшысы Қасым-Жомарт Кемелұлы Тоқаевтың дарынды балаларға жасаған қолдауының жарқын көрінісі. Әр ауысымда мұнда дарынды, зияткерлік және шығармашылық әлеуеті жоғары 30 оқушы демалады. 12 күндік демалыс барысында олар танымдық, білім беру және шығармашылық бағдарламаларға қатысып, өз қабілеттерін дамытуға мүмкіндік алады.
Лагерь заманауи талаптарға сай жабдықталған. Мұнда бассейн, тренажер залы, кітапхана, білім беру және шығармашылық үйірмелер жұмыс істейді. Сонымен қатар, мәдени-танымдық іс-шаралар, концерттік бағдарламалар, спорт жарыстары мен интеллектуалдық ойындар ұйымдастырылып, балалардың жан-жақты дамуына қолайлы жағдай жасалған.
Лагерьдегі әрбір күн балалардың қызығушылығын арттыруға, жаңа білім мен дағдыларды меңгеруге бағытталған. Оқушылар тәжірибелі педагогтер мен мамандардың жетекшілігімен түрлі жобаларға қатысып, өз ойларын еркін жеткізуге, топпен жұмыс істеуге және көшбасшылық қабілеттерін шыңдауға мүмкіндік алады.
Сонымен қатар, демалыс орны балалардың өзара қарым-қатынас орнатып, жаңа достар табуына, шығармашылық идеяларын жүзеге асыруына ықпал етеді. Әртүрлі бағыттағы үйірмелер мен шеберлік сабақтары олардың бос уақытын тиімді өткізуіне және жеке қабілеттерін ашуына жағдай жасауда.
Жазғы лагерьде оқушылардың қауіпсіздігі мен жайлы демалысы басты назарда ұсталады. Балалардың күн тәртібі дұрыс ұйымдастырылып, олардың денсаулығын нығайтуға, белсенді өмір салтын қалыптастыруға бағытталған жұмыстар жүргізілуде.
Осындай жобалар арқылы жас ұрпақтың білімге деген қызығушылығы артып, дарынды балалардың әлеуетін дамытуға жаңа мүмкіндіктер ашылады. Лагерь оқушылардың жазғы демалысын мазмұнды өткізіп қана қоймай, олардың болашақ жетістіктеріне негіз болатын маңызды ортаға айналуда.
