jetpisbai.kz Ұлы Дала жаңалықтары
Түркістан қаласында білім беру саласын дамыту және жас ұрпаққа сапалы білім мен тағылымды тәрбие беру бағытында жүйелі жұмыстар атқарылуда. Қаланың білім беру ұйымдарында оқу үдерісімен қатар, ұлттық тәрбие мен рухани құндылықтарды дәріптеуге, оқушылардың қоғамдық ортадағы белсенділігін арттыруға және олардың болашаққа деген жауапкершілігін қалыптастыруға ерекше мән берілуде. Бұл бағыттағы жұмыстар мектеп пен ата-ананың, педагог пен оқушының өзара ынтымақтастығы арқылы жүзеге асырылуда.
Қазіргі таңда жас ұрпақ тәрбиесі – қоғам алдындағы ең маңызды міндеттердің бірі. Ел болашағының баянды болуы бүгінгі өскелең ұрпақтың білімі мен тәрбиесіне тікелей байланысты. Сондықтан білім беру ұйымдарында оқушылардың бойына ұлттық құндылықтарды сіңіріп, оларды адалдыққа, еңбекқорлыққа және жауапкершілікке баулу жұмыстары жүйелі түрде жүргізілуде.
Осы мақсатта №33 жалпы білім беретін мектебінде «Адал азамат» біртұтас тәрбие бағдарламасы аясында бірқатар маңызды іс-шаралар ұйымдастырылуда. Бағдарламаның негізгі бағыты – ұлттық құндылықтарды дәріптеу, оқушылардың бойында патриоттық сезімді қалыптастыру, адал еңбек пен білімге деген құрметті арттыру.
Мектебімізде өткізілетін тәрбие сағаттары, танымдық кездесулер, қайырымдылық акциялары, мәдени-көпшілік іс-шаралар мен спорттық жарыстар оқушылардың жан-жақты дамуына ықпал етуде. Бұл жұмыстар жас ұрпақтың бойында адалдық, әділдік, мейірімділік, сыйластық және жауапкершілік қасиеттерін қалыптастыруға бағытталған.
Адал азамат – қоғамның дамуына үлес қосатын, өз Отанының нағыз патриоты, білімді де тәрбиелі тұлға. Осындай азаматтарды тәрбиелеу – бүгінгі мектептің басты міндеттерінің бірі.
№33 жалпы білім беретін мектебінің ұжымы алдағы уақытта да «Адал азамат» бағдарламасы аясындағы жұмыстарды жалғастырып, ел ертеңі болатын жас буынның саналы, білімді және тәрбиелі болып қалыптасуына өз үлесін қоса береді.
Білімді әрі тәрбиелі ұрпақ қалыптастыруда педагогтің кәсіби шеберлігі мен азаматтық ұстанымының орны ерекше. Осыған байланысты ұстаз еңбегін дәріптеу, педагог кәсібінің қоғамдағы беделін арттыру және өскелең ұрпақ арасында мұғалім мамандығының маңызын кеңінен түсіндіру жұмыстарының мәні артып отыр. Ұстазды құрметтеу арқылы білімге, еңбекке және жауапкершілікке деген оң көзқарасты қалыптастыруға болады.
Өскелең ұрпаққа педагог кәсібінің ерекшелігін таныстыру бағытындағы ақпараттық-түсіндіру жұмыстары да маңызды. Мұғалімдердің кәсіби жетістіктерін, озық тәжірибесін және шәкірт тәрбиесіндегі еңбегін мемлекеттік тілде кеңінен насихаттау жастардың бұл мамандыққа деген қызығушылығын арттыруға мүмкіндік береді. Сонымен қатар педагог мамандығының қоғам үшін маңызын түсіндіру білім саласына деген құрметті күшейтеді.
Мектепке дейінгі және орта білім беру кезеңдері баланың тұлғалық қалыптасуында ерекше орын алады. Осы кезеңдерде баланың білім алуға қызығушылығын оятып қана қоймай, оның қарым-қатынас мәдениетін, еңбекке деген көзқарасын, өз ісіне жауапкершілігін қалыптастыру маңызды. Сондықтан тәрбие мен білімнің сабақтастығын қамтамасыз ету жас ұрпақтың болашақта өз орнын табуына берік негіз қалайды.
Білім беру саласындағы атқарылып жатқан жұмыстарды мемлекеттік тілде ақпараттық сүйемелдеу мен түсіндіру қоғам мен білім беру ұйымдары арасындағы байланысты нығайтуға ықпал етеді. Мектеп өміріндегі маңызды бастамаларды, оқушылардың жетістіктерін, педагогтердің еңбегін және тәрбиелік жобаларды көпшілікке жүйелі түрде жеткізу арқылы ата-аналардың білім беру үдерісіне деген қызығушылығын арттыруға болады. Мұндай жұмыстар жас ұрпақ тәрбиесіне ортақ жауапкершілікті күшейтіп, білім мен тәрбиенің маңызын қоғамға кеңінен танытуға мүмкіндік береді.
Тәрбиенің нәтижесі бір күнде қалыптаспайды, ол күнделікті оқу-тәрбие үдерісі, ұстаздың өнегесі және отбасының қолдауы арқылы біртіндеп орнығады. Осы тұрғыдан алғанда, мектепте қалыптасқан қолайлы тәрбиелік орта әр оқушының өз қабілетін танып, дұрыс шешім қабылдауына және қоғамдағы өз орнын түсінуіне мүмкіндік береді. Бұл – білім беру сапасымен қатар, тұлғаның өмірлік ұстанымдарын қалыптастыруға бағытталған маңызды жұмыс.
Алдағы уақытта да Түркістан қаласының білім беру ұйымдарында жас ұрпақтың зияткерлік, рухани және әлеуметтік әлеуетін дамытуға бағытталған бастамалар жалғасын табады. Білім мен тәрбиені қатар ұштастырған жүйелі жұмыс нәтижесінде өз еліне жанашыр, еңбекке бейім, білімге ұмтылатын және қоғам игілігіне қызмет етуге дайын жастардың қалыптасуына берік негіз қаланады.
Түркістан қаласы №33 жалпы білім беретін мектебінің директоры П.Бекеева
