jetpisbai.kz Ұлы Дала жаңалықтары
Ана мен баланың қауіпсіздігін қамтамасыз ету, олардың құқықтары мен заңды мүдделерін қорғау – әлеуметтік саясаттың маңызды бағыттарының бірі. Осы ретте тұрмыстық зорлық-зомбылықтың алдын алу, қиын жағдайға тап болған әйелдер мен балаларға уақытылы әлеуметтік, психологиялық, медициналық және құқықтық қолдау көрсету, сондай-ақ олардың қауіпсіздігін қамтамасыз ету бағытындағы жұмыстардың маңызы зор.
Шымкент қаласында тұрмыстық зорлық-зомбылықтың алдын алуға және отбасылық-тұрмыстық саладағы құқық бұзушылықтарға жол бермеуге бағытталған «Тұрмыс» жедел-профилактикалық іс-шарасы аясында қалалық полиция департаменті мен әлеуметтік көмек көрсету орталықтарының бірлескен жұмысы жалғасуда.
Осы мақсатта департамент бастығының орынбасары Еркебұлан Ережепов №3 арнайы әлеуметтік көмек көрсету орталығына барып, әйелдер мен кәмелетке толмағандарға қатысты зорлық-зомбылық қылмыстарын тергейтін әйел тергеушілермен және орталық қызметкерлерімен кездесті.
Кездесу барысында зорлық-зомбылықтан зардап шеккен азаматтарға қажетті психологиялық, әлеуметтік, медициналық және құқықтық көмек көрсету, олардың қауіпсіздігін қамтамасыз ету және құқықтарын қорғау мәселелері талқыланды. Аталған бағытта жасалған меморандум аясында әйелдердің жыныстық бостандығына және кәмелетке толмағандардың жыныстық тиіспеушілігіне қарсы қылмыстарды тергеу барысында зардап шеккендермен жұмыс істеу үшін әйел тергеушілер бекітілген.
Ана мен баланы қорғау жөніндегі қызметте зардап шеккен адамдарға кешенді қолдау көрсету, олардың қауіпсіздігін қамтамасыз ету және қажетті мамандардың көмегіне қолжетімділігін арттыру ерекше маңызға ие. Осы бағыттағы жұмыстар әйелдер мен балалардың құқықтарын қорғаумен қатар, отбасындағы қауіпсіз ортаны қалыптастыруға және зорлық-зомбылықтың алдын алуға бағытталған.
Кездесу қорытындысы бойынша тараптар зорлық-зомбылықтың алдын алу, зардап шеккен адамдарға қажетті көмек көрсету және олардың құқықтары мен қауіпсіздігін қамтамасыз ету бағытында өзара іс-қимылды күшейтуге уағдаласты. Сонымен қатар, тиісті мемлекеттік органдар мен ұйымдар арасында ақпарат алмасуды жетілдіру, профилактикалық жұмыстарды жүйелі түрде жүргізу және бірлескен іс-шараларды ұйымдастыру жөнінде келісімдер жасалды.
Мұндай өзара іс-қимыл әйелдер мен балалардың қауіпсіздігін қамтамасыз етуге, олардың құқықтары мен заңды мүдделерін қорғауға және отбасылық-тұрмыстық зорлық-зомбылықтың алдын алу тетіктерін жетілдіруге мүмкіндік береді. Полиция, әлеуметтік қызметтер және тиісті ұйымдардың үйлесімді жұмысы қиын жағдайға тап болған азаматтарға қажетті көмекті дер кезінде көрсетуге бағытталған.
