jetpisbai.kz Ұлы Дала жаңалықтары
Шымкент қалалық ЖИТС-тің алдын алу және оған қарсы күрес орталығында АИТВ-инфекциясының анадан балаға берілуінің алдын алу бағытында жүйелі жұмыстар жүргізілуде. Жүкті әйелдерді ерте анықтау, медициналық бақылауға алу, антиретровирустық терапиямен қамтамасыз ету және нәрестелердің денсаулығын бақылау бойынша кешенді шаралар жүзеге асырылуда.
1990 жылдан бері АИТВ-мен өмір сүретін аналардан дүниеге келген 741 бала АИТВ-инфекциясы анықталмай, дені сау болып есептен шығарылған.
2026 жылдың басынан бері АИТВ-мен өмір сүретін аналардан 15 бала дүниеге келді. Қазіргі таңда 15 баланың барлығының да дені сау, АИТВ инфекциясының анадан балаға берілу жағдайы тіркелген жоқ.
Бұл нәтижеге АИТВ-инфекциясын дер кезінде анықтау, жүкті әйелдерді тұрақты медициналық бақылауда ұстау, антиретровирустық терапияны уақтылы бастау және профилактикалық шараларды сақтау арқылы қол жеткізілуде.
Мамандардың айтуынша, АИТВ-мен өмір сүретін әйел дәрігердің ұсынымдарын сақтап, қажетті емді тұрақты қабылдаған жағдайда дені сау бала дүниеге әкеле алады. Сондықтан жүктілік кезінде АИТВ-ға тексеруден өту, медициналық бақылауда болу және тағайындалған емді үзбей қабылдау маңызды.
Шымкент қалалық ЖИТС орталығы ана мен бала денсаулығын қорғауға, АИТВ инфекциясының алдын алуға және халық арасында ақпараттық-түсіндіру жұмыстарын жүргізуге бағытталған шараларды тұрақты түрде жалғастыруда.
Алдын алу шараларының тиімділігі медициналық қызметтердің қолжетімділігі мен мамандардың үйлесімді жұмысына тікелей байланысты. Осы бағытта жүкті әйелдерге қажетті кеңес беріліп, зертханалық тексерулер жүргізіліп, әрбір жағдай бойынша жеке медициналық сүйемелдеу қамтамасыз етіледі.
Сонымен қатар, ана мен бала денсаулығын қорғауда ақпараттық-түсіндіру жұмыстарының маңызы зор. Әйелдерге АИТВ инфекциясының алдын алу жолдары, жүктілік кезіндегі тексерудің маңыздылығы және емді үзбей қабылдаудың қажеттілігі түсіндіріледі.
Қол жеткізілген көрсеткіштер профилактикалық және медициналық көмектің нәтижелілігін көрсетеді. Алдағы уақытта да анадан балаға АИТВ инфекциясының берілу қаупін барынша төмендету, ерте диагностика мен емдеуді жетілдіру жұмыстары жалғаса береді.
Бұл бағыттағы жұмыстың маңызды бөлігі – медициналық көмекті уақытылы алу қажеттілігін тұрғындарға кеңінен түсіндіру. Жүктілікті жоспарлау кезеңінен бастап дәрігерге қаралу, қажетті тексерулерден өту және мамандардың ұсынымдарын орындау ана мен баланың денсаулығын сақтауға мүмкіндік береді.
