jetpisbai.kz Ұлы Дала жаңалықтары
Мемлекет басшысы Қ.Тоқаев «Әділетті мемлекет. Біртұтас ұлт. Берекелі қоғам» атты Жолдауында «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек, деп айтып өткен болатын.
Осы орада, бүгін Шымкент қаласының әкімі М.Әйтеновтің қатысуымен өткен арнайы жиында ‘’i-shуmkent” ситуациялық орталығының жұмысын жақсарту тетіктері пысықталды, деп хабарлайды jetpisbai.kz.
Шымкент қаласы әкімінің баспасөз қызметінің мәлімдеуінше, жыл басынан бері орталыққа 530 431 арыз-шағым түскен. Соңғы кездері қоғамдық көліктердің жұмысына, жөндеу жұмыстарына қатысты жарықтың сөнуіне, судың тапшылығына байланысты арыздар жиілеген. Жиында азаматтар тарапынан түскен талап-тілектерді орындауда туындаған өзекті мәселелер талқыланып, шешу жолдары қарастырылды.
24/7 тәртібінде жұмыс істейтін орталыққа халық бірыңғай 109 нөмірі және арнайы әлеуметтік желілер арқылы хабарласа алады. Бүгінде орталық мамандары біліктілікті арттыру мақсатында арнайы курстардан өтуде. М.Дүйсенбекұлы жауаптыларға әрбір арыз-шағымға толық, сапалы жауап беріп, тиісті шаралардың қолданылуын бақылауға алуды тапсырды.
Сондай-ақ әлеуметтік желілерде белсенділікті арттырып, халықпен кері байланысты күшейту қажеттігін ескертті. Ақпарат үшін айта кетсек, Шымкент қаласындағы ситуациялық орталығы мемлекет басшысының ’’Халық үніне құлақ асатын мемлекет” тұжырымдамасына сәйкес жүзеге асқан бірден-бір жоба. Тұрғындар психологиялық және заң көмегі, жалпы тәжірибелік дәрігерге (терапевт) жазылу, қоғамдық көліктер мен тұрғындар көп шоғырланған жерлерде жоғалған не тауып алған заттар, еңбек қатынастары мәселелері бойынша қоңырау шалып, мәслелерін шеше алады.
Қызмет түрлері:
Ауланы абаттандыру;
Ауланы жабдықтандыру;
Отынмен қамтамасыз ету мәселесі;
Қаланы сумен жабдықтау;
Өндірістік жұмыстардан кейінгі қалпына келтіру;
Газбен жабдықтау;
Лифт жұмысы;
Қалалық жол инфрақұрылымдары;
Денсаулық сақтау;
Жұмыспен қамту және әлеуметтік қорғау;
Тұтынушылардың құқықтарын қорғау;
Қоғамдық көлік;
ПИК жұмысы;
Тұрмыстық қалдықтар;
Су басу;
Ашық құдықтар;
ТШК (су ,жылу, электр-энергия);
БЖЗҚ бойынша;
Білім беру мәселелері;
Заң, тәртіп және тағы басқа мәселелер бойынша. Мекен жайы: Бәйдібек би даңғылы, 116 «Наурыз парк» ТК.
