jetpisbai.kz Ұлы Дала жаңалықтары
Түркістан облысының әкімі Нұралхан Көшеров Созақ ауданына жұмыс сапарымен барып, «СП «Инкай» ЖШС-нің 30 жылдығына арналған салтанатты іс-шараға қатысты.
Өңір басшысы кәсіпорынның өндірістік және әлеуметтік инфрақұрылымымен танысты. Атап айтқанда, спорт кешені, асхана, демалыс аймақтары, тұрғын блоктар мен жаттығу залы көрсетіліп, компанияның қызметі мен жетістіктері туралы ақпарат ұсынылды. Сондай-ақ мерейтойға орай орнатылған арнайы монументтің ашылу рәсімі өтті. Бұдан кейін мәртебелі меймандар құрметті қонақтар кітабына қолтаңба қалдырды.
Салтанатты жиын барысында облыс әкімі Нұралхан Көшеров компания ұжымын мерейтоймен құттықтап, «Инкай» кәсіпорнының өңір дамуына қосқан үлесін атап өтті.
— Баршаңызды еліміздің тау-кен саласындағы маңдайалды кәсіпорындардың бірі — «Инкай» компаниясының 30 жылдық мерейтойымен шын жүректен құттықтаймын! Мемлекет басшысы Қасым-Жомарт Кемелұлы Тоқаев өндірістік әлеуетті арттырумен қатар, бизнестің әлеуметтік жауапкершілігін күшейтуді тапсырды. Созақ ауданының экономикалық күретамырына айналған «Инкай» компаниясы өз міндетін абыроймен атқарып, өңірдің әлеуметтік-экономикалық дамуына зор үлес қосуда. Компания мемлекетіміздің сенімді стратегиялық серіктесі ретінде өзіндік кірісті көбейтіп, жергілікті халықтың әл-ауқатын арттыруға да өз ықпалын тигізіп жүр. Әсіресе, компанияның белсенді әлеуметтік ұстанымын ерекше атап өткім келеді. Отыз жыл ішінде компания жаңа мектептер мен заманауи медициналық және спорттық нысандар салу мен жаңғыртуға, инфрақұрылымды дамытуға қолдау көрсетті. Нәтижесінде жаңа жұмыс орындары ашылды. Бұл бағыттағы игі істер, соның ішінде елді мекендерді абаттандыру мен экологиялық тұрақтылықты сақтау жобалары — бизнестің халықпен етене жақындығының жарқын үлгісі. Құрметті компания ұжымы! Сіздерді айтулы мерекемен тағы да құттықтай отырып, атқарған еңбектеріңіз үшін алғыс айтамын! Алдағы уақытта да «Инкай» компаниясы өзінің инновациялық қуатын арттырып, Түркістан облысының өркендеуіне, ұлттық экономиканың дамуына өзіндік үлесін қоса береді деп сенемін. Баршаңызға зор денсаулық, отбасыларыңызға амандық, еңбектеріңізге толағай табыс тілеймін! — деді өңір басшысы.
Мерекелік іс-шара концерттік бағдарламамен жалғасын тауып, танымал өнер ұжымдары өнер көрсетті. Сонымен қатар қатысушылар арасында викториналар ұйымдастырылып, ұтысқа бағалы сыйлықтар тігілді.
Айта кетейік, «СП «Инкай» ЖШС – уран өндіру саласындағы ірі кәсіпорындардың бірі. Компания 30 жыл ішінде өндірістік әлеуетін арттырып қана қоймай, өңірдің әлеуметтік-экономикалық дамуына да елеулі үлес қосып келеді.
Компанияның 30 жылдық мерейтойы тек салтанатты шара ғана емес, сонымен қатар өңірдегі тау-кен өнеркәсібінің даму динамикасын көрсететін маңызды кезең ретінде бағаланды. Соңғы жылдары кәсіпорын өндіріс көлемін тұрақты түрде арттырып, жаңа технологияларды енгізу арқылы халықаралық стандарттарға сай жұмыс істеу деңгейіне көтерілді. Бұл өз кезегінде өнімнің бәсекеге қабілеттілігін күшейтіп, саланың тұрақты дамуына жол ашып отыр.
Сонымен қатар әлеуметтік жауапкершілік бағыты да жүйелі түрде жалғасып келеді. Кәсіпорын тарапынан қызметкерлердің тұрмыс сапасын жақсартуға арналған тұрғын үй бағдарламалары, әлеуметтік қолдау шаралары және қауіпсіз еңбек жағдайларын қамтамасыз етуге бағытталған жобалар іске асырылған. Мұндай бастамалар еңбек ұжымының тұрақтылығын арттырып, мамандардың кәсіби дамуына қолайлы орта қалыптастыруға ықпал етуде.
Өңірлік деңгейде бұл кәсіпорынның қызметі Созақ ауданының инфрақұрылымдық дамуына да серпін беріп отыр. Жол, әлеуметтік нысандар және инженерлік желілерді жаңғырту бағытындағы бірқатар жобаларға қолдау көрсетілуі жергілікті халықтың өмір сапасын жақсартуға мүмкіндік берді. Сонымен бірге шағын және орта бизнес өкілдері үшін де жаңа экономикалық мүмкіндіктер қалыптасуда.
Жалпы, «СП «Инкай» ЖШС-нің ұзақ жылдық тәжірибесі мен тұрақты дамуы Түркістан облысындағы индустриялық сектордың әлеуетін айқын көрсетеді. Алдағы уақытта да компанияның инновациялық жобаларды енгізу арқылы өндірістік қуатын арттырып, өңірдің әлеуметтік-экономикалық өркендеуіне үлес қоса беретіні күтілуде.
