jetpisbai.kz Ұлы Дала жаңалықтары
Қазақстан Республикасының Әбілхан Қастеев атындағы Ұлттық өнер музейінде қазақ гобелен өнерінің ұлттық мектебінің негізін қалаушылардың бірі, қазақстандық суретші Батима Заурбекованың туғанына 80 жыл толуына орай «Мұра жіптері» атты ауқымды көрме ұйымдастырылады.
Көрме 2026 жылғы 25 қыркүйек пен 8 қараша аралығында өтеді. Экспозицияға музей қорынан және суретшінің отбасылық мұрағатынан алынған 80-нен астам туынды – гобелендер, кескіндеме және графика жұмыстары қойылады.
Гобелен – бейнені бояумен емес, тоқыма станогында түрлі түсті жіптерді тоқу арқылы жасайтын сәндік-қолданбалы өнер туындысы. Қазақстанда бұл өнер түрі ХХ ғасырдың екінші жартысында қарқынды дамыды. Осы кезеңде суретшілер дәстүрлі кілем тоқу өнері мен киіз басу, ою-өрнек дәстүрлерін кәсіби бейнелеу өнерінің жаңа бағыты ретінде қайта пайымдай бастады.
Осылайша халықтық көркемдік мотивтерді, ұлттық ою-өрнекті және заманауи кескіндеме тілін тоғыстырған қазақстандық гобелен мектебі қалыптасты. Оның негізін қалаған көрнекті тұлғалардың бірі – Батима Заурбекова.
Батима Заурбекова – Қазақстанның еңбек сіңірген өнер қайраткері, Қазақ КСР Мемлекеттік сыйлығының лауреаты. Жарты ғасырдан астам уақытқа созылған шығармашылық жолында суретші дәстүрлі өнер мен заманауи көркемдік тілді сабақтастыра отырып, қазақстандық гобелен өнерінің қалыптасуы мен дамуына елеулі үлес қосты.
Экспозиция барысында суретшінің шығармашылық ізденістері мен көркемдік қолтаңбасының қалыптасу кезеңдері кеңінен таныстырылады. Көрермен Батима Заурбекованың ұлттық дүниетанымды заманауи бейнелеу тәсілдерімен ұштастырған туындылары арқылы қазақ гобеленінің өзіндік ерекшелігін тереңірек түсіне алады.
Көрменің 80 жылдық мерейтойға орай ұйымдастырылуы суретшінің шығармашылық мұрасын кейінгі ұрпаққа таныстыруға және ұлттық сәндік-қолданбалы өнердің маңызын насихаттауға мүмкіндік береді. Экспозиция өнер сүйер қауымға қазақ гобеленінің тарихы мен бүгінгі мәдени кеңістіктегі орнын жаңа қырынан бағалауға жол ашады.
Көрме Батима Заурбекованың шығармашылығын әлемдік мәдени үдеріс аясында таныстырып, оның негізгі көркемдік бағыттарын халықтық өнер және модернизмнің кескіндемелік ағымдарымен сабақтастықта ашады.
«Мұра жіптері» экспозициясы үш залдан тұратын саяхат форматында ұйымдастырылған.
