jetpisbai.kz Ұлы Дала жаңалықтары
Биыл мемлекет және қоғам қайраткері, ғалым-этнограф Өзбекәлі Жәнібековтің туғанына 95 жыл толып отыр. Ұлттық мәдениет пен тарихи мұраны сақтап, жаңғыртуға өлшеусіз үлес қосқан тұлғаның мерейтойы еліміз бойынша кеңінен аталып өтуде.
Мерейтойға орай Түркістан қаласында «Өзбекәлі Жәнібеков мұрасының зерттелуі» тақырыбында қала әкімі Әзімбек Пазылбекұлының және филология ғылымдарының докторы, профессор Құлбек Ергөбек, тарих ғылымдарының докторы, профессор Хазретәлі Тұрсұн, «Ықылас Дүкенұлы» атындағы халық музыкалық аспаптар музейінің жетекшісі Бауыржан Жәнібеков және Өзбекәлі Жәнібеков қорының президенті Әзел Жәнібекованың қатысуымен мәдени іс-шара өтті.
Өзбекәлі Жәнібековтің қазақ халқының ұлттық мәдениетін, ана тілін, салт-дәстүрі мен әдет-ғұрпын жаңғыртудағы еңбегі кеңінен сөз болып, оның отандық музей ісін дамытуға, этнографиялық музейлердің ашылуына, ұлттық қолөнер мен фольклорлық өнерді насихаттауға қосқан үлесі атап өтілді.
Сондай-ақ, шара аясында құнды жәдігерлер көрмесі ұйымдастырылды. Кездесу ғылыми баяндамалармен қатар, ұлттық өнерді дәріптейтін концерттік бағдарламаға ұласты. Белгілі әнші Жұбаныш Жексенұлы ән орындап, көпшілікке рухани әсер сыйлады.
Мерейтойлық шара Түркістан мен Арқалық арасындағы мәдени-рухани сабақтастықты да айшықтады. Арқалық қаласынан арнайы келген шығармашылық ұжым бүгін сағат 19:00-де Сонымен бірге, Түркістан музыкалық драма театрында Тобыл-Торғай өңірінен арнайы келген Арқалық қазақ жасөспірімдер театры Арқалық қаласының 70 жылдығы мен Өзбекәлі Жәнібековтің 95 жылдығына арналған «Арқалықтың ақ таңы» театрландырылған қойылымын көрермен назарына ұсынды.
Қойылымды Түркістан қаласының әкімі Әзімбек Пазылбекұлы, Арқалық қаласынан келген арнайы делегация, зиялы қауым өкілдері мен қала тұрғындары тамашалады.
«Арқалықтың ақ таңы» – Арқалық өңірінің тарихын, елдік мұратын және ұлттық құндылықтарды арқау еткен тағылымды туынды. Қойылымда Өзбекәлі Жәнібековтің ел тарихы мен ұлттық мәдениетті сақтау, жаңғырту және ұрпақ санасына сіңіру жолындағы ерен еңбегі кеңінен көрініс тапты.
Өзбекәлі Жәнібековтің ұлттық мұраны ұлықтау жолындағы өнегелі ғұмыры – кейінгі ұрпаққа үлгі. Тұлғаның тағылымды жолын өнер арқылы дәріптеу – тарихи жадымызды жаңғыртып, ұлттық құндылықтарымызды насихаттаудың маңызды көрінісі.
Мәдени шара Түркістан мен Арқалық арасындағы рухани-мәдени байланысты нығайтып, қос өңірдің ортақ тарихи құндылықтарын дәріптеуге мүмкіндік берді.
Өзбекәлі Жәнібековтің ұлттық мәдениетке қатысты ұстанымдары бүгінгі қоғам үшін де өзекті. Оның мұраны сақтау ғана емес, оны заман талабына сай танытуға деген көзқарасы мәдени құндылықтарды келешек ұрпаққа жеткізудің маңызын айқындай түседі.
Түркістан қаласында тарихи тұлғалардың еңбегін кеңінен насихаттайтын осындай тағылымды кездесулердің өтуі жас ұрпақтың ел тарихына деген қызығушылығын арттырады. Ұлттық мұрамен танысу арқылы жастар туған жердің мәдениеті мен тарихын тереңірек танып, оны қорғауға және дамытуға деген жауапкершілігін сезіне алады.
Ана тілін, ұлттық дәстүр мен мәдениетті дәріптеу – қоғамның рухани тұтастығын қалыптастыратын маңызды бағыттардың бірі. Өзбекәлі Жәнібековтің осы саладағы еңбегін зерделеу мемлекеттік тілдің қолданыс аясын кеңейтуге, қазақ тіліндегі мәдени және ғылыми мазмұнға қызығушылықты арттыруға да серпін береді.
Мұндай мәдени-ағартушылық шаралар азаматтардың білімге, тарихты зерттеуге және кітап оқуға деген ынтасын арттыруға ықпал етеді. Тұлғаның өмірі мен қызметіне қатысты еңбектерді оқу арқылы оқырман тарихи деректерді саралап, ел дамуына үлес қосқан азаматтардың тәжірибесінен тағылым алады.
Түркістан қаласының мәдени кеңістігінде ұлттық мұра мен заманауи шығармашылықтың қатар насихатталуы жасампаз бастамаларға жол ашады. Өткеннен сабақ алып, бүгінгі мүмкіндіктерді тиімді пайдалану – қоғамның алға жылжуына, мәдени және зияткерлік әлеуеттің артуына негіз болады.
Өзбекәлі Жәнібековтің мұрасы – өткеннің естелігі ғана емес, келешекке бағыт беретін рухани бағдар. Оның елге қызмет ету жолы әр азаматты өз ортасына пайдалы іс жасауға, білімін жетілдіруге, ұлттық құндылықтарды қадірлеуге және қоғамның дамуына белсенді атсалысуға үндейді.
Осындай тағылымды шаралар Түркістан қаласының рухани өмірін байытып, ұлттық тарих пен мәдениетті дәріптеуге кең мүмкіндік береді. Өзбекәлі Жәнібековтің өнегелі жолын кейінгі буынға таныту арқылы елге қызмет ету, білімге ұмтылу және ұлттық құндылықтарды заманауи тұрғыда дамыту идеялары сабақтастық табады.
