jetpisbai.kz Ұлы Дала жаңалықтары
Білімді, тәрбиелі әрі дені сау ұрпақ – ұлттың ең қымбат байлығы. Олай болса, балалар мен жасөспірімдердің оқумен қатар, өнер үйреніп, спортпен шұғылданып, жан-жақты жетілуіне қолайлы жағдай жасау – мемлекеттің мойнындағы борышы. Сол себепті Мемлекет басшысы Қасым-Жомарт Тоқаев өзінің Президент ретіндегі алғашқы Жолдауында бұқаралық спортты дамыту мәселесіне назар аударған болатын.
Президент тапсырмасын жүзеге асыру мақсатында Шымкент қаласында бұқаралық спортты дамытуда жоспарлы жұмыстар жүзеге асырылуда.
Жеңілатлетикалық манежде кикбокстан ерлер және әйелдер арасында Қазақстан Республикасы чемпионатының салтанатты түрде ашылу рәсімі өтті. Іс-шараға Шымкент қаласы денешынықтыру және спорт басқармасы басшысының орынбасары Ермек Дәрменов, ҚР Кикбоксинг федерациясының президенті Тастанбек Есентаев, қалалық Полиция департаменті бастығы, генерал-майор Қайрат Дәлбеков қатысып, спортшыларға сәттілік тіледі.
ҚР чемпионатына еліміздің барлық аймағынан 200-ден астам спортшы келген. Аталған сайыс кикбоксшыларды алдағы халықаралық тунирлерге іріктейтін жауапты сын болмақ.
– Елімізде бұқаралық спортты дамытуға баса назар аударылып отыр. Қазіргі таңда Шымкент қаласында бұқаралық спортты дамытумен қатар, жоғары спорт шеберлігін одан әрі жетілдіруге қала әкімдігі тарапынан қолдау көрсетілуде. Шаһарда кикбокс спортымен 600-ден аса спортшы тұрақты түрде шұғылданады. Осы жарысқа қатысушылар арасынан алда жоғары жетістіктерге жететін дарынды жастар шығатынына сенім білдіреміз. Жарыста тек мықтылар жеңіске жетсін, – деді басқарма басшысының орынбасары.
ҚР Кикбоксинг федерациясының президенті Тастанбек Есентаев ел чемпионаты алда Португалияда өтетін әлем чемпионатына іріктеу кезеңдерінің бірі екенін атап өтті. ҚР чемпионатынан кейін ұлттық құрама қайтадан жасақталады.
Сондай-ақ, жиында кикбокс спортына қосқан үлесі үшін бірқатар азаматтар ҚР Мәдениет және спорт министрлігінің Алғыс хатымен марапатталды. Жарыс жеңімпаздары 17 тамыз күні анықталады.
