ҚОС НҰРЕКЕМ – ТҮРКІСТАНҒА ДОС НҰРЕКЕМ!..

Йасы, Шауғар аттарымен көнеден бері танылып келген Ер Түріктің бесігі – Түркістанымыз біраздан бері жаңадан түлеп, түрленіп, тұрғындарының тебіренісін тудырып келе жатқан рухани астанамызға айналды!

Оның жаңарған келбетін көріп, сәулеті мен дәулетіне қанша сүйсінсек те, артықтық етпейді!

«Жаманды жасырып, жақсыны асырып» әдеттенген Оңтүстік жұрты Түркістан атын жеті қат аспаннан әрі асқақтатып, әлемге бұл киелі мекенді жаңа қырынан таныта түсті.

ІІ.

Осынау қасиетті мекен жаңадан құрылған облысымыздың орталығына айналғалы бері бұл жерде қарқынды жұмыс жүріп, бүкіл қала үлкен бір құрылыс алаңына айналды. Бұл ауқымды жұмыстардың басы-қасында облыс тізгінін ұстап келе жатқан облыс әкімі мен облыстық мәслихаттың төрағасы жүргенін көзіміз көрді. Әсіресе, соңғы үш жыл ішінде Түркістан ерекше құлпыра түскеніне көпшілік куә! Бұл да болса атқарушы және өкілетті билік өкілдерінің «бір жеңнен қол, бір жағадан бас шығара» ынтымақтасып жұмыс істегендерінің арқасы.

ІІІ.

Бүгінде Түркістанда:

«Бақ, қайда барасың? Ынтымағы бірінші орында тұрған Түркістанға барамын!» деген әңгіме кеңінен тараған.

Оның басты себептері: сол ынтымақты нығайтып, күшейген үстіне күшейтіп, биік тұғырға көтерген Түркістан облысының әкімі Нұралхан Көшеров пен облыстық мәслихат төрағасы Нұралы Әбішев екеуінің іскерлігі, татулығы, қай істі болсын ақылдаса аяқтайтын, қай мәселені болсын жұмыла шешетін Ұлы Далаға ғана тән іскерліктерінің арқасында. Лайым солай болғай!..

IV.

Соңғы үш жыл қатарынан Түркістан облысы Республика бойынша барлық көрсеткіш бойынша бірінші орынды жеңіп келе жатыр. Бұл, әрине, жайдан-жай емес! Осынау жетістіктердің астарында үлкен еңбек, өзара ынтымақтастық, ел ішіндегі тыныштық, этносаралық түсіністік, жалпы Түркістан жұртының теңдесі жоқ еңбекқорлығы жатыр. Осы үшін қуанамыз, осыны мақтан тұтамыз, осыған тәубе етеміз!

Ал, қалың елді бір кісідей жұмылдырып, айрандай ұйытып келе жатқан облыс басшыларына ерекше алғыс айтудың еш сөкеттігі жоқ шығар?!.

V.

Түркістан облыстық Мәслихатының төрағасы, III дәрежелі «Барыс» орденінің иегері Нұралы Әбішевтің жазбаларынан:

1. «Елдің даму бағытын дұрыс айқындау, уақыт талабына сай шешімдер қабылдау ерекше маңызға ие».

2. «Оң өзгерістердің негізінде өзара түсіністік, ынтымақ, жауапкершілік және қажырлы еңбек жатыр».

3. «Түркістан облысы әлеуметтік-экономикалық даму қарқыны жөнінен республикадағы жетекші өңірлердің қатарына енді».

4. «Әрине, бұл жетістіктер – облыс әкімдігі мен барлық мемлекеттік органдардың, мәслихаттардың, қоғамдық институттардың, кәсіпкерлер мен еңбекқор халықтың ортақ еңбегінің нәтижесі».