jetpisbai.kz Ұлы Дала жаңалықтары
25–27 тамыз аралығында Созақ ауданында «Біз біргеміз» іс-шарасы аясында отбасылық-тұрмыстық зорлық-зомбылықтың алдын алу бағытында ақпараттық-түсіндіру жұмыстары жүргізілді.
Созақ ауданы полиция бөлімінің Қоғамдық қауіпсіздік бөлімшесінің Отбасылық-тұрмыстық зорлық-зомбылыққа қарсы тобының қызметкерлері тұрғындармен кездесіп, зорлық-зомбылықтың алдын алу, құқықтық көмек алу және қорғау тетіктері туралы түсіндірді. Сонымен қатар, тұрғындарға тақырыптық ақпараттық парақшалар таратылды.
Егер Сіз зорлық-зомбылыққа тап болсаңыз немесе оның куәсі болсаңыз, 102, 111, 150 нөмірлеріне хабарласыңыз.
Сіздің құқықтарыңыз қорғалады! Әрбір хабарлама бойынша қажетті шаралар қабылданады.
Отбасындағы қауіпсіз әрі қолайлы орта қалыптастыру – қоғамның тұрақты дамуының маңызды шарттарының бірі. Әрбір азамат өз құқықтары мен заңмен белгіленген қорғау тетіктерін білуі қиын жағдайға тап болған кезде дұрыс шешім қабылдауына мүмкіндік береді.
Ақпараттық-түсіндіру жұмыстары тұрғындардың құқықтық сауаттылығын арттыруға бағытталған. Кездесулер барысында зорлық-зомбылықтың кез келген түріне жол бермеу, мәселені жасырмай, дер кезінде тиісті органдарға жүгіну қажеттігі түсіндіріледі.
Отбасылық жанжалдардың алдын алуда өзара сыйластық пен жауапкершіліктің маңызы зор. Әсіресе балалардың қауіпсіздігіне ерекше назар аударып, олардың психологиялық және физикалық тұрғыдан қорғалған ортада тәрбиеленуіне жағдай жасау – ата-ана мен қоғамның ортақ міндеті.
Созақ ауданында өткізілген түсіндіру жұмыстары тұрғындардың құқықтық мәдениетін көтеріп, мәселеге бейжай қарамаудың маңызын жеткізуге мүмкіндік берді. Мұндай кездесулер азаматтар мен жауапты мемлекеттік органдар арасындағы байланысты нығайтып, қажетті көмекке жедел жүгіну мүмкіндігін арттырады.
Біз біргеміз!
